پی ڈی ایم اے پنجاب کے مطابق رواں ماہ درجہ حرارت اوسطاً 8 ڈگری تک بڑھ جائے گا جس کے پیشِ نظر 21 اور 27 مئی کے دوران دن کے اوقات میں ہیٹ ویو کے امکانات موجود ہیں۔پی ڈی ایم اے پنجاب نے رواں ماہ ہیٹ ویو، بارشوں اور طوفان کا الرٹ جاری کردیا۔ ترجمان پی ڈی ایم اے کے مطابق راولپنڈی،مری،گلیات،اٹک،چکوال،منڈی بہاوالدین،گجرات،جہلم،گجرانوالہ،لاہور، قصور،سیالکوٹ،نارووال، اوکاڑہ،فیصل آباد ٹوبہ ٹیک سنگھ جھنگ خوشاب سرگودھا اور میانوالی میں آندھی و بارشوں کے امکانات ہیں۔ موسم خشک اور درجہ حرارت نارمل سے6 ڈگری زیادہ تک رہے گا۔ ڈی جی پی ڈی ایم اے عرفان علی کاٹھیا کا کہنا تھا کہ وزیر اعلی پنجاب کی ہدایت کے مطابق ضلعی انتظامیہ کو الرٹ جاری کر دیا ہے۔ گرمی اور لو کی شدت میں اضافے سے عوام الناس کو بھی محتاط رہنا ہو گا۔ دوپہر کے وقت کام کرنے والے لو سے بچنے کا اہتمام کریں۔ محکمہ صحت، آبپاشی تعمیر و مواصلات لوکل گورنمنٹ اور لایؤ سٹاک کو الرٹ جاری کر دیاگیا ہے۔ ڈی جی عرفان علی کاٹھیا نے مزید کہا کہ انفارمیشن ڈیپارٹمنٹ،واسا، پنجاب پولیس اور سول ڈیفنس کو بھی موسمی صورتحال کے پیش نظر الرٹ جاری کردیا گیاہے۔ شہری آسمانی بجلی سے تحفظ کیلئے محفوظ مقامات پر رہیں۔ عوام الناس بجلی کی گرج چمک اور طوفانی صورتحال میں کھلے آسمان تلے ہرگز نہ جائیں اورایمرجنسی صورتحال میں پی ڈی ایم اے ہیلپ لائن 1129 یا ریسکیو 1122سے رابطہ کریں۔
