پاکستان میں گھریلو ایل پی جی گیس کے نرخوں نے عام صارفین کی مشکلات میں مزید اضافہ کر دیا ہے۔ ایک طرف آئل اینڈ گیس ریگولیٹری اتھارٹی (اوگرا) ہر ماہ گیس کی زیادہ سے زیادہ فروختی قیمت مقرر کرتی ہے، دوسری طرف کھلی مارکیٹ میں صارفین کو اس سے کہیں زیادہ قیمت ادا کرنا پڑ رہی ہے۔ سوال یہ ہے کہ جب حکومت نے قیمتیں مقرر کرنے اور ان پر عمل درآمد کا نظام بنا رکھا ہے تو پھر عوام سرکاری نرخوں پر گیس حاصل کرنے سے کیوں محروم ہیں؟ کیا اوگرا کی قیمت محض کاغذی کارروائی بن کر رہ گئی ہے؟اوگرا کے 31 اکتوبر 2026ء کے نوٹیفکیشن کے مطابق یکم نومبر سے ایل پی جی کی زیادہ سے زیادہ صارف قیمت 294 روپے 8 پیسے فی کلو مقرر کی گئی ہے، جبکہ 11.8 کلوگرام کے گھریلو سلنڈر کی قیمت 3 ہزار 470 روپے 9 پیسے ہے۔ اکتوبر میں یہی سلنڈر 3 ہزار 296 روپے 23 پیسے کا تھا۔ یعنی ایک ماہ میں 173 روپے 86 پیسے اضافہ ہوا۔ اوگرا کے مطابق سعودی آرامکو کی کنٹریکٹ قیمت میں 6.47 فیصد اضافے نے اس اضافے میں بنیادی کردار ادا کیا۔ دوسری طرف نومبر کے آغاز میں مختلف علاقوں کی کھلی مارکیٹ میں گیس 600 روپے فی کلو تک فروخت ہونے کی اطلاعات سامنے آئیں۔ یوں سرکاری اور بعض مقامات کے بازاری نرخوں میں تقریباً دوگنا فرق پیدا ہو گیا۔ یہاں بنیادی بات سمجھنے کا ضرورت ہے کہ اوگرا کا مقرر کردہ نرخ زیادہ سے زیادہ قانونی قیمت ہے، کم از کم قیمت نہیں۔ ایل پی جی پالیسی 2016ء کے تحت مقامی اور درآمدی گیس سمیت سپلائی چین کے تمام مراحل پر زیادہ سے زیادہ قیمت کی پابندی ہے۔ پیداوار، مارکیٹنگ اور تقسیم کار کمپنیاں اس سے کم قیمت پر فروخت کر سکتی ہیں، لیکن مقررہ حد سے تجاوز کا جواز محض منافع کی خواہش نہیں بن سکتا۔ اس بحران کی ایک بڑی وجہ رسد اور طلب میں عدم توازن، درآمدی گیس کی لاگت، عالمی منڈی کی قیمتوں میں اضافہ، ترسیل کے مسائل اور ذخیرہ اندوزی کے امکانات ہیں۔ نومبر کے آغاز میں ایل پی جی کی قلت کو علاقائی جنگی حالات اور سپلائی میں رکاوٹوں سے بھی منسلک کیا گیا۔ تاہم قلت کی آڑ میں ناجائز منافع خوری یا مصنوعی بحران پیدا کرنا کسی صورت قابل قبول نہیں۔ ذمہ داری کا تعین کرتے ہوئے صرف دکاندار کو موردِ الزام ٹھہرانا کافی نہیں۔ اوگرا، وزارتِ توانائی کا پٹرولیم ڈویژن، ایل پی جی مارکیٹنگ کمپنیاں، درآمد کنندگان، ڈسٹری بیوٹرز اور ضلعی انتظامیہ سب اپنے اپنے دائرہ اختیار میں جواب دہ ہیں۔ اوگرا کو قیمتوں کی نگرانی، خلاف ورزی کرنے والی کمپنیوں کے خلاف کارروائی اور سپلائی کے اعدادوشمار کی جانچ کرنی چاہیے، جبکہ ضلعی انتظامیہ کو سرکاری نرخوں پر فروخت یقینی بنانی چاہیے۔تشویش ناک پہلو یہ ہے کہ جب مارکیٹ میں گیس مہنگی فروخت ہوتی ہے تو بعض انتظامی اہلکار قیمتوں پر قابو پانے اور سستی گیس کی فراہمی یقینی بنانے کے بجائے دکانوں اور گوداموں پر چھاپے مار کر فروخت بند کرا دیتے ہیں۔ غیر محفوظ سلنڈروں، غیر قانونی ری فلنگ، غیر معیاری آلات اور حفاظتی ضوابط کی خلاف ورزی کے خلاف کارروائی یقیناً ضروری ہے، لیکن محض فروخت بند کرانا مسئلے کا حل نہیں۔ اگر کسی علاقے میں چند دکانیں بند کر دی جائیں اور متبادل سپلائی کا انتظام نہ ہو تو قلت مزید بڑھ سکتی ہے۔ انتظامیہ کی کامیابی چھاپوں کی تعداد سے نہیں بلکہ صارف کو مقررہ قیمت پر گیس کی دستیابی سے ناپی جانی چاہیے۔
اس بحران پر قابو پانے کے لیے ضروری ہے کہ حکومت سب سے پہلے ملک بھر میں ایل پی جی کی طلب، مقامی پیداوار، درآمدات اور دستیاب ذخائر کے مستند اعدادوشمار جاری کرے۔ جہاں رسد میں کمی ہو وہاں فوری درآمدی انتظامات کیے جائیں۔ مارکیٹنگ کمپنیوں کے کوٹے، گیس کی ترسیل اور ڈسٹری بیوٹرز تک پہنچنے والی مقدار کی نگرانی کی جائے۔ ہر ضلع میں سرکاری نرخوں کے مطابق فروخت کے مراکز قائم کیے جائیں اور ہر دکان پر فی کلو اور سلنڈر کی قیمت نمایاں طور پر آویزاں کرنا لازمی قرار دیا جائے۔اوگرا کو شکایات کے فوری ازالے، مارکیٹنگ کمپنیوں کے لائسنسوں کی جانچ اور ذخیرہ اندوزی یا ناجائز منافع خوری میں ملوث عناصر کے خلاف مؤثر کارروائی کرنی چاہیے۔ ضلعی انتظامیہ، پرائس کنٹرول مجسٹریٹس اور متعلقہ محکمہ صنعت کو مشترکہ نگرانی کا نظام بنانا ہوگا۔ شکایت کنندہ کو صرف کارروائی کی یقین دہانی نہیں بلکہ نتیجہ بھی بتایا جائے۔ خلاف ورزی ثابت ہونے پر جرمانے، قانونی کارروائی اور ضرورت پڑنے پر لائسنس کی معطلی جیسے اقدامات کیے جائیں۔حکومت کو یہ بھی سمجھنا ہوگا کہ ایل پی جی کوئی تعیش کی چیز نہیں بلکہ ان لاکھوں خاندانوں کی بنیادی ضرورت ہے جہاں پائپ لائن گیس دستیاب نہیں یا اس کی فراہمی غیر یقینی ہے۔ خصوصاً سردیوں میں گھریلو صارفین کو منافع خوروں کے رحم و کرم پر چھوڑ دینا عوامی ذمہ داریوں سے انحراف ہے۔اصل سوال یہ نہیں کہ اوگرا نے نرخ کتنے مقرر کیے، بلکہ یہ ہے کہ ان نرخوں پر گیس عوام تک کیوں نہیں پہنچ رہی؟ اگر متعلقہ ادارے اپنی ذمہ داریاں پوری نہیں کر پا رہے تو ان کی کارکردگی کا احتساب کون کرے گا؟ حکومت کو چھاپوں کی تشہیر کے بجائے گیس کی دستیابی، قیمتوں کی پابندی اور صارفین کے حقوق کا تحفظ یقینی بنانا ہوگا۔ بصورت دیگر اوگرا کا نوٹیفکیشن دیوار پر آویزاں رہے گا اور عوام مہنگی گیس خریدنے پر مجبور رہیں گے۔تحقیقی حوالہ: اوگرا کا نومبر 2026ء کا نرخ نامہ، ایل پی جی پالیسی 2016ء اور یکم نومبر 2026ء کی اخباری رپورٹس۔
