وزیر بلدیات ذیشان رفیق نے کہا ہے کہ ایسے منصوبے مکمل کریں گے جو قومی اثاثہ ثابت ہوں۔ وزیراعلی مریم نواز ڈنگ ٹپائو منصوبوں کے کلچر کے خلاف ہیں۔ وزیراعلٰی کے ویژن پر مکمل عملدرآمد کیا جائے گا۔ وہ سول سیکرٹریٹ میں ہونے والے ایک اجلاس کی صدارت کر رہے تھے جس میں منتخب دیہات میں میونسپل سروسز کی فراہمی کے پروگرام میں پیشرفت کا جائزہ لیا گیا۔ سیکرٹری لوکل گورنمنٹ شکیل احمد میاں اور سپیشل سیکرٹری آسیہ گل نے بھی شرکت کی۔ پنجاب رورل میونسپل سروسز کمپنی (پی آر ایم ایس سی) کے سی ای او اسداللہ نے اجلاس کو بریفنگ دی۔
وزیر بلدیات ذیشان رفیق نے کہا کہ ورلڈ بینک کے تعاون سے پہلے مرحلے میں 16 تحصیلوں کے 1802 دیہات کی اپ گریڈیشن ہوگی۔ اس ضمن میں ان دیہات کی ضروریات کا سروے کر لیا گیا ہے جبکہ 200 دیہات میں ماڈل میونسپل خدمات مہیا بھی کی جا چکی ہیں۔ وزیر بلدیات نے کہا کہ ورلڈ بینک کے تعاون سے پسماندہ دیہات میں واٹر سپلائی، سیوریج اور پکی گلیوں کے منصوبے مکمل کئے جائیں گے۔ اس پروگرام کے پہلے مرحلے میں بہاولنگر، خیرپور ٹامیوالی، کہروڑ پکا، شجاع آباد، علی پور، تونسہ شریف، لیاقت پور، روجھان، کلرکہار، نورپور تھل، عیسی خیل، کوٹ مومن، دریا خان، بھوآنہ، احمدپور سیال اور پاکپتن کی تحصیلیں شامل ہیں۔ وزیر بلدیات نے پی آر ایم ایس سی کی جانب سے دیہات میں بند ڈرین بنانے کی تجویز سے عدم اتفاق کرتے ہوئے کہا کہ دیہی معاشرے میں مویشی پالنے کے کلچر کے باعث گوبر سے بند ڈرین مسائل پیدا کرسکتی ہے۔ انہوں نے پی آر ایم ایس سی کے سی ای او کو ہدایت کی کہ یہ معاملہ ورلڈ بینک کے سامنے اٹھایا جائے اور کھلے ڈرین کی تعمیر پر زور دیا جائے۔ پمپنگ سٹیشنوں اور ٹیوب ویلز کو سولرائزڈ کیا جائے جبکہ ترقیاتی سکیموں کے آغاز سے پہلے ٹائون میپنگ لازمی کی جائے۔ صوبائی وزیر نے پی آر ایم ایس سی کو فوری طور پر ای ٹینڈرنگ پر منتقل کرنے کا حکم دیتے ہوئے سپیشل سیکرٹری کو ہدایت کی کہ اس حوالے سے متعلقہ حکام کے ساتھ جلد رابطہ کیا جائے۔ انہوں نے زور دیتے ہوئے کہا کہ ستھرا پنجاب پروگرام کے بعد رورل ڈویلپمنٹ منصوبے سے سالڈ ویسٹ کا کمپوننٹ ختم کیا جائے کیونکہ ہر گائوں میں پہلے ہی صفائی کا انتظام کیا جا چکا ہے تاہم پی آر ایم ایس سی اپنے زیر انتظام دیہات میں صرف صفائی کی مانیٹرنگ کرسکتی ہے۔
