"وزیر اعلیٰ پنجاب مریم نواز شریف کی زیرِ صدارت پنجاب ہاؤسنگ اینڈ ٹاؤن پلاننگ ایجنسی (PHATA)کی گورننگ باڈی کا 99واں اجلاس منعقد ہوا۔اجلاس میں رواں مالی سال کے لئے34ارب 73 کروڑ کے سرپلس بجٹ کی منظوری دے دی گئی۔ وزیراعلیٰ مریم نوازشریف نے پھاٹا سے پرائیویٹ پارٹنرشپ سے ہاؤسنگ پراجیکٹ مکمل کرنے کا پلان طلب کرلیا۔اپنی چھت ……اپنا گھر پروگرام کی منظوری بھی دے دی گئی ۔اجلاس میں بریفنگ کے دوران بتایا گیا کہ اپنی چھت ۔۔۔ اپنا گھر پورٹل پر5-لاکھ 44 ہزار لوگ پورٹل پر رجسٹرڈ ہیں۔اپنی چھت ۔۔۔ اپنا گھر پراجیکٹ میں گھر بنانے کے لئےدولاکھ اسی ہزار درخواستیں موصول ہوئی ہیں۔ اپنی چھت۔۔۔اپنا گھر پروگرام کے لئے ڈرافٹ ایپلیکیشن 76ہزار سے زائد ہیں۔
گورننگ باڈی کے اجلاس میں پھاٹا کو معاہدہ سائن کرنے کی اجازت دے دی گئی۔وزیراعلیٰ مریم نوازشریف نےدرخواست دہندگان کے قواعد کی تصدیق کا عمل بروقت اورتیزی سے جاری رکھنے کی ہدایت کی۔گورننگ باڈی اجلاس میں پھاٹا کے ڈیٹا انٹری آپریٹرز کے سکیل کواپ گریڈ کرنے کی منظوری بھی دے دی گئی۔ پھاٹا سروسز ریگولیشن2004کے تحت سول سب انجینئر کی بھرتی کی منظوری بھی دی گئی ۔بجٹ کی منظوری کابینہ کی بجائے پھاٹا گورننگ باڈی کی اجازت سے مشروط کرنے کا اصولی فیصلہ کیا گیا۔سابق ہاؤسنگ سکیموں میں قرعہ اندازی میں نام نہ نکلنے والے درخواست دہندگان کے واجبات کی واپسی کی اجازت دے دی گئی۔پھاٹا،پی ایم یوکےلئے سٹاف ہائرنگ جاب پورٹل کے ذریعے کرنے کی منظوری دی گئی۔ پھاٹا کو زیر التواء ہاؤسنگ سکیموں کا کیس ٹو کیس جائزہ لے کر منظوری کے بارے میں فیصلہ کرنے کی ہدایت کی گئی۔ رسیدات وصولیوں کا تخمینہ 17 ارب اور اخراجات کا تخمینہ 13 -ارب 55کروڑ روپے ہے۔
