محکمہ لوکل گورنمنٹ اینڈ کمیونٹی ڈویلپمنٹ لاہور اور سنگت ڈویلپمنٹ فاﺅنڈیشن کے مابین مفاہمتی یاداشت پر دستخط ہو گئے۔ سنگت ڈویلپمنٹ فاؤنڈیشن اور لوکل گورنمنٹ اینڈ کمیونٹی ڈویلپمنٹ لاہور کے مابین خاتون سہولت مرکز کے قیام کےلئے مفاہمتی یاداشت پر دستخط کرنے کی تقریب کا انعقاد کیا گیا۔ لوکل گورنمنٹ اینڈ کمیونٹی ڈویلپمنٹ لاہور کی طرف سے ڈپٹی ڈائریکٹر نوید سردار اور سنگت ڈویلپمنٹ فاونڈیشن کی طرف سے ایگزیکٹو ڈائریکٹر زاہد اسلام نے دستخط کئے۔ سنگت ڈویلپمنٹ فاونڈیشن کے توسیعی پراجیکٹ "بولو اور بڑھو” کے تحت قائم "خاتون سہولت مرکز” میں مقامی خواتین کو بلدیاتی و سماجی مسائل پر رانمائی و معاونت فراہم کی جاتی ہے۔ خاتون سہولت مرکز میں خواتین سٹاف ہی شکایات کنندگان کی نہ صرف شکایات درج کرتی ہیں بلکہ فالو اپ بھی کرتی ہیں۔ یہ پروجیکٹ دراصل خواتین کو مین اسٹریم کرنے کی عملی کوشش ہے کہ جس کے نتیجے میں خواتین بلدیاتی مسائل کی نشاندہی کے لئے متحرک ہوتی ہیں۔
پروجیکٹ پر عملدرآمد کے لئے SDF کو جرمن ادارہ جی آئی زیڈ کی مدد کے ساتھ ساتھ لوکل گورنمنٹ اینڈ کمیونٹی ڈویلپمنٹ، پنجاب کی سرپرستی حاصل ہے۔ تقریب میں سنگت ٹیم کے علاوہ یونین کونسل رائیونڈ کے سٹاف نے شرکت کی۔
