ضلعی انتظامیہ اور انوائرمنٹ پروٹیکشن ایجنسی کا اسموگ میں کمی کا اقدام، لاہور میں ہیوی ٹریفک کا داخلہ ہفتہ میں 2 روز ممنوع قرار دے دیا گیا ہے۔ہیوی ٹرانسپورٹ بروز جمعہ اور اتوار شہر میں داخل نہیں ہو سکیں گی۔
ڈی سی لاہور سید موسیٰ رضا کی زیر صدارت اسموگ کے تدارک کا اہم اجلاس منعقد ہوا۔اجلاس میں ایڈیشنل ڈپٹی کمشنر مدثر نواز، ڈپٹی ڈائریکٹر ماحولیات علی اعجاز اور سیکرٹری آر ٹی اے شریک ہوئے۔ایچ ٹی وی پر پابندی انوائرمنٹ پروٹیکشن ایکٹ 1997 کے تحت لگائی گئی ہے۔نوٹیفکیشن کے مطابق پابندی کا اطلاق 8 نومبر 2024 سے 31 جنوری 2025 تک ہوگا۔خلاف ورزی پر پاکستان پینل کوڈ کے سیکشن 188 کے تحت کارروائی ہوگی۔شہریوں کو اشیاء ضروریہ کی فراہمی کے لئے انتظامات کیے جائیں گے۔ادویات، پٹرول، میڈیکل اور خوراک کی فراہمی کے لئے استثنیٰ ہوگا۔
انسپیکشن سرٹیفیکیٹ والی مسافر بسوں کو استثنیٰ حاصل ہوگا۔
ایمبولینس، فائر بریگیڈ، ریسکیو 1122، پولیس اور قیدی ویگن کو استثنیٰ دیا گیا ہے۔ ڈپٹی کمشنر لاہور سید موسٰی رضا نے کہا ہے کہ
فضائی آلودگی پر قابو پانے کے لئے ضلعی انتظامیہ کوشاں ہے۔ محکمہ ماحولیات نے اسموگ پر قابو پانے کے لئے اقدامات کئے گئے ہیں۔فضائی آلودگی کے باعث پابندیوں کا اطلاق ضروری ہے۔
