پنجاب میں سالڈ ویسٹ مینجمنٹ کے معیاری اور دیرپا نظام کے افتتاح کی تیاریاں مکمل کر لی گئی ہیں۔ "مریم نواز کا پنجاب، ستھرا پنجاب” پروگرام کی لانچنگ 3 دسمبر کو ہوگی۔ وزیراعلی مریم نواز شریف افتتاح کریں گی۔ اس ضمن میں وزیر بلدیات ذیشان رفیق کی زیر صدارت ایل ڈبلیو ایم سی آفس میں ہونے والے اجلاس کے دوران تقریب کے انتظامات کو حتمی شکل دی گئی۔ اس موقع پر صوبائی وزیر نے ضروری ہدایات جاری کیں۔ ایل ڈبلیو ایم سی کے سی ای او بابر صاحب دین نے وزیر بلدیات کو تقریب کے انتظامات پر بریفنگ دی۔
وزیر بلدیات ذیشان رفیق نے کہا کہ پبلک پرائیویٹ پارٹنر شپ کے منفرد پراجیکٹ کا آغاز میرے لئے فخر کی بات ہے۔ وزیراعلی نے عوام کو سہولیات کی فراہمی کی جو ذمہ داری ہمیں سونپی ہے اسکی تکمیل یقینی بنائیں گے۔ انہوں نے کہا کہ سیکرٹری لوکل گورنمنٹ شکیل احمد میاں اور ویسٹ مینجمنٹ کمپنیوں کے سی ای اوز مبارکباد کے مستحق ہیں جنہوں نے وزیراعلی کے ویژن کو عملی جامہ پہنانے کے لئے شبانہ روز کام کیا۔ ذیشان رفیق نے کہا کہ لاہور میں سالڈ ویسٹ سسٹم کی تعمیرنو بھی اسی پروگرام کا حصہ ہے۔ پنجاب کے شہروں اور دیہات میں پہلی بار صفائی کا یکساں نظام رائج ہونے والا ہے۔ گھر گھر سے ویسٹ کولیکشن کر کے اسکی محفوظ ڈمپنگ یقینی بنائیں گے۔ ہر علاقے کی مینوئل سویپنگ اور نالیوں کی ڈی سلٹنگ ہوگی۔ وزیر بلدیات نے کہا کہ صفائی کے نئے نظام کو کامیاب بنانا عوام اور منتخب نمائندوں کی بھی ذمہ داری ہے۔ انہوں نے کہا کہ وزیراعلی مریم نواز تقریب کے دوران ستھرا پنجاب ایپ بھی لانچ کریں گی جس سے شہری ہر قسم کا فیڈبیک دے سکیں گے۔ ذیشان رفیق نے کہا کہ نئے نظام کے تحت شہریوں کی شکایات کے فوری ازالے کا موثر میکانزم بنایا گیا ہے۔ ہر سطح پر سٹوڈنٹس میں صفائی کی اہمیت اجاگر کرنے کی مہم چلائیں گے۔ انہوں نے کہا کہ پہلی بار آرٹیفیشل انٹیلی جنس کے ذریعے صفائی کی مانیٹرنگ ہوگی۔ عملہ صفائی کی حاضری کا موثر طریقہ کار بنایا گیا ہے۔ اس کے علاوہ ہیلپ لائن 1139 کے ذریعے بھی شہری اپنی شکایات درج کرا سکیں گے۔
