پشاور(بلدیات ٹائمز)واٹر اینڈ سینیٹیشن کمپنیز کے حکام آپے سے باہر۔عوام کی طرف سے بلدیاتی ملازمین کے ساتھ غلط رویہ ،بدکلامی اور ناانصافی کے بعد واسا اتھارٹی کے منیجرز کی طرف سے بھی ملازمین کو تحفظ فراھم کرنے کی بجائے ملازمین کے حقوق کی پامالی اور عزت نفس کو مجروع کرنا کسی طرح بھی قابل برداشت نہیں ھے۔ واسا ایبٹ آباد کے چند عاقبت نااندیش افسران کی طرف سے ملازمین کے ساتھ ماورائے آئین و ماورائے اختیار اقدامات اٹھانے اور ملازمین کو حراساں کرنے سے صوبہ بھر کے بلدیاتی ملازمین میں سخت بے چینی پھیل گئی ھے۔ لوکل گورنمنٹ ایمپلائز فیڈریشن خیبرپختونخوا کے عہدیداران نے واسا کمپنیز کی طرف سے ماورائے اختیار اقدامات اٹھانے اور بلدیاتی ملازمین کے بنیادی ، آئینی حقوق کی پامالی پر سخت رد عمل کا اظہار کرتے ھوئے واسا کمپنیز کے حکام کو تنبیہ کی ھے کہ اگر بلدیاتی ملازمین کے حقوق کی پامالی بند کر کے ملازمین کو تحفظ فراھم نہ کیا گیا تو صوبہ بھر کے بلدیاتی ملازمین واسا کمپنیز کے غیر آئینی اور ماورائے اختیار اقدامات کے خلاف بھر پور احتجاج کریں گے جس کی تمام تر ذمہ داری واسا کمپنیز پر عائد ہو گی۔
