میلہ بہاراں 2025 کے دوسرے دن نے عوام میں زبردست پذیرائی حاصل کی، جب عوام کی بڑی تعداد وزیر خان چوک، سبیل والی گلی اور گلی سو رجن سنگھ میں جمع ہو کر شہر کی رنگین روایات کو منانے کے لیے اکٹھی ہوئی۔ اس تہوار نے شائقین کو مختلف ورکشاپوں، کہانی سنانے کے سیشنز، روایتی موسیقی اور رقص کی محفلوں کے ذریعے محظوظ کیا۔اس سال، میلہ بہاراں نے لاہور کو، جو اپنے مصروف بازاروں اور ہمہ وقت رونقوں کی وجہ سے مشہور ہے، ایک دلکش پھولوں سے سجی ہوئی جنت میں بدل دیا۔ ہر گلی اور کونہ رنگین پھولوں کی نمائشوں سے آراستہ تھا، جس نے سیاحوں کو خوشگوار اور دلکش تجربہ فراہم کیا۔
دوسرے دن کی ایک اہم جھلک کوچہ شاہ حسین کا افتتاح تھا، جسے والڈ سٹی آف لاہور اتھارٹی (WCLA) نے بحال کیا ہے۔ یہ اقدام لاہور کے تاریخی فن تعمیر اور ثقافتی ورثے کے تحفظ کی جاری کوششوں کا ایک نمایاں نمونہ ہے۔
پاکستان انسٹیٹیوٹ آف فیشن ڈیزائن (PIFD) کی زیورات اور چمڑے کی مصنوعات کی ورکشاپ بھی ایک اہم کشش تھی، جہاں شرکاء نے عملی طور پر فن پارے تخلیق کرنے کا تجربہ حاصل کیا۔ زائرین نے الف لیلیٰ کہانی سنانے کے سیشن اور پودا کہانی کا بھی لطف اٹھایا، جس نے لاہور کی کلاسیکی شاموں کی یاد تازہ کر دی۔
پنجاب حکومت پرانے لاہور کی ثقافت کو دوبارہ زندہ کرنے اور لوگوں میں محبت و امن کا ماحول پیدا کرنے کے لیے پُرعزم ہے۔ والڈ سٹی آف لاہور اتھارٹی کے ڈائریکٹر جنرل، کامران لاشاری نے اس موقع پر کہا، “میلہ بہاراں نہ صرف لاہور کی ثقافتی تاریخ کو زندہ کرتا ہے بلکہ اس کے ذریعے ہم اپنی روایات، فنون اور ورثے کو نئی نسل تک منتقل کر رہے ہیں تاکہ ان کے دلوں میں ہماری ثقافت کے لیے محبت اور فخر پیدا ہو سکے۔”
میلہ میں شریک ایک سیاح نے اپنے تجربات کا اظہار کرتے ہوئے کہا، “یہ دیکھ کر بہت خوشی ہوئی کہ لاہور کی گلیاں ایسی ثقافتی توانائی سے بھر گئی ہیں۔ لوک پرفارمنسز اور لائیو موسیقی ہمیں اپنی وراثت کی خوبصورتی کی یاد دلاتی ہیں۔
” ایک اور زائر نے کہا، “مٹی کے برتن بنانے کی ورکشاپ کا تجربہ شاندار تھا – میں نے کبھی نہیں سوچا تھا کہ روایتی مٹی کے برتن بنانا اتنا دلچسپ ہو سکتا ہے!”
اخوت اور کمیونل ہب کے نمائندوں نے اس طرح کے ایونٹس کی اہمیت پر زور دیا، جو کمیونٹی کی شرکت اور شمولیت کو فروغ دیتے ہیں۔ اخوت کے ترجمان نے کہا، “ہمارا مقصد ثقافتی سرگرمیوں کے ذریعے لوگوں میں اتحاد کا احساس پیدا کرنا ہے۔ میلہ بہاراں اس جذبے کی عکاسی کرتا ہے۔”
میلہ بہاراں 2025 کے انعقاد میں والڈ سٹی آف لاہور اتھارٹی کو پنجاب گورنمنٹ ، الائیڈ بنک، گوبیز پینٹ، پاکستان انسٹیوٹ آف فیشن اینڈ ڈیزائن ، اور اخوت کا تعاون حاصل ہے۔
