ستھرا پنجاب مہم کے تحت لاہور ویسٹ مینجمنٹ کمپنی کی جانب سے بڑے اقدامات کا سلسلہ جاری ہے۔سی ای او بابر صاحب دین کی زیرِ صدارت وسیع پیمانے پر صفائی سے متعلق آگاہی کے لیے ایل ڈبلیو ایم سی ہیڈ آفس میں علماء و مشائخ کانفرنس کا انعقاد کیا گیا۔
ڈاکٹر مفتی انتخاب احمد نوری ممبر اسلامی نظریاتی کونسل کی سربراہی میں 22 سے زائد علماء کرام نے کانفرنس میں شرکت کی۔ سی ای او ایل ڈبلیو ایم سی کا اس اہم کانفرنس کے اہتمام کے حوالے سے کہنا ہے کہ صفائی ستھرائی کے فروغ میں علماء کا کردار اہم ہے۔ستھرا پنجاب صفائی مہم کے لیے بڑے پیمانے پر آگاہی مہم شروع کی جا رہی ہے جس میں ایل ڈبلیو ایم سی اور علماء کرام مل کر ستھرا پنجاب صفائی مہم میں اپنا کردار ادا کریں گے۔ صفائی نظام کو برقرار رکھنے کے لیے ڈویژنل اور ضلعی سطح پر صفائی کی اہمیت کے موضوع پر علماء کانفرنسز منعقد کی جائیں گی۔خطبات جمعہ اور اعلانات سے صفائی کے پیغام کو عام کیا جائے گا، علماء کرام اور ایل ڈبلیو ایم سی کے ٹاؤن لیول افسران مشترکہ صفائی سرگرمیوں میں حصہ لیں گے۔مزید برآں سی ای او ایل ڈبلیو ایم سی نے مختلف مکاتب فکر کے علماء کی طرف سے پیش کی جانے والی صفائی کے حوالے سے تجاویز کا خیرمقدم کرتے ہوئے اپنے خطاب میں کہا کہ ڈویژن اور ضلع کی سطح پر کانفرنسز سے بڑے پیمانے پر عوامی آگاہی میں مدد ملے گی۔علماء و مشائخ کانفرنسز میں صفائی کے پیغام کو صوبہ بھر میں پھیلایا جائے گا۔
