مہمند ڈیم سے منسلک کمیونٹی اسکیمز کے حوالے سے محکمہ منصوبہ بندی و ترقی میں ایک اہم اجلاس منعقد ہوا جس میں عوامی نمائندوں، ضلعی انتظامیہ، واپڈا حکام اور دیگر متعلقہ اسٹیک ہولڈرز نے شرکت کی۔ اجلاس میں ڈیم کے ساتھ منسلک کمیونٹی سے متعلق منصوبوں کا تفصیلی جائزہ لیا گیا اور ان کی پیش رفت پر تبادلہ خیال کیا گیا۔ شرکاء نے مختلف علاقوں میں مقامی سطح پر درپیش مسائل اور ضروریات کے حوالے سے تجاویز بھی پیش کیں۔ایڈیشنل چیف سیکرٹری منصوبہ بندی و ترقی محمد اسلام زیب نے ہدایت کی کہ تمام کمیونٹی اسکیمز کے PC-1 جلد از جلد تیار کرکے جمع کرائے جائیں تاکہ ان کی منظوری اور عمل درآمد کے مراحل کو تیز کیا جاسکے۔ انہوں نے چیف اکانومسٹ کو ہدایت کی کہ منصوبوں کی تیاری اور منظوری کے عمل میں مکمل معاونت فراہم کی جائے تاکہ پراسیس میں کسی قسم کی تاخیر نہ ہو اور منصوبوں پر کام بروقت شروع ہوسکے۔ مہمند ڈیم کے ساتھ منسلک یہ کمیونٹی اسکیمز مقامی آبادی کی فلاح و بہبود، بنیادی سہولیات کی فراہمی اور علاقے کی سماجی و معاشی ترقی کیلئے اہم ثابت ہوں گی۔
