وزیر اعلٰی خیبر پختونخوا علی امین گنڈاپور کی زیر صدارت سالانہ ترقیاتی پروگرام سے متعلق اجلاس منعقد ہوا ۔ متعلقہ کابینہ اراکین، ایڈیشنل چیف سیکرٹری منصوبہ بندی، متعلقہ انتظامی سیکرٹریز اور دیگر حکام نے شرکت کی۔ اجلاس میں سالانہ ترقیاتی پروگرام میں شامل محکمہ صنعت کے جاری منصوبوں پر پیشرفت کا تفصیلی جائزہ لیا گیا ۔وزیر اعلٰی نے متعلقہ حکام کو فنی تعلیم کے شعبے پر خصوص توجہ دینے کی ہدایت کی۔وزیر اعلٰی علی امین گنڈاپور نے کہا کہ نوجوانوں کو روزگار دینے کے لئے فنی تعلیم کے شعبے پر خاطر خواہ سرمایہ کاری کی ضرورت ہے، فنی تربیت کے موجودہ نظام کو قومی اور بین الاقوامی جابز مارکیٹ کے تقاضوں سے ہم آہنگ کرنے کے لئے اقدامات کئے جائیں، فنی تعلیم کے شعبے میں طلبہ کو سکالرشپس دینے کے لئے انڈومنٹ فنڈ قائم کیا جائے۔نوجوانوں کو بین الاقوامی جاب مارکیٹس میں کھپانے کے لئے فنی تربیت کے پروگراموں کی انٹرنیشنل سرٹیفیکیشن پر کام کیا جائے، معیاری فنی تربیت کی فراہمی کے سلسلے میں ماسٹر ٹرینرز کی دستیابی کے لئے پروگرام شروع کیا جائے، فنی تربیتی اداروں اور مقامی صنعتوں کے درمیان روابط کو مزید بہتر اور مضبوط بنایا جائے۔وزیر اعلٰی نے سرکاری محکموں میں ٹیکنیکل عملے کی بھرتی کے لئے ٹیکنیکل سرٹیفیکیشن لازمی قرار دینے کی ہدایت کی۔ انہوں نے کہا کہ
اس بات کو یقینی بنایا جائے کہ تسلیم شدہ سند کے بغیر سرکاری محکموں میں پلمبر، الیکٹریشن اور ڈرائیور سمیت کوئی بھی ٹیکنیکل عملہ بھرتی نہ ہو، ٹیکنیکل آسامیوں پر بغیر سند یافتہ امیدواروں کو بھرتی کرنا سند یافتہ امیدواروں کی حق تلفی ہے، اس مقصد کے لئے تمام محکمے متعلقہ قواعد و ضوابط میں ضروری ترمیم کریں، خلاف ورزی کی صورت میں متعلقہ حکام کے خلاف کارروائی عمل میں لائی جائے گی۔علی امین گنڈاپورنے کہا کہ صوبے میں صنعتی اور تجارتی سرگرمیوں کے فروغ کے لئے اکنامک زونز اور انڈسٹریل زونز کے منصوبوں پر خصوصی توجہ دی جائے، اکنامک زونز اور انڈسٹریل زونز قائم کرنے کے جاری منصوبوں پر کام کی رفتار کو تیز کیا جائے، موزوں مقامات پر نئے اکنامک زونز کے قیام کے لئے منصوبے تجویز کئے جائیں، صنعتوں کے فروغ کے ذریعے لوگوں کے لئے روزگار کے مواقع پیدا کئے جاسکتے ہیں، اس مقصد کے لئے نجی سرمایہ کاری کو راغب کرنے کے لئے اقدامات کئے جائیں۔
صوبے میں صنعت کے شعبے میں سرمایہ کاری کے بے پناہ مواقع موجود ہیں، صوبائی حکومت صوبے میں سرمایہ کاری کے خواہشمند سرمایہ کاروں کو ہر ممکن سہولیات فراہم کرے گی، موجودہ صوبائی حکومت اس مقصد کے لئے سرمایہ کاری کے پیچیدہ عمل کو سہل بنانے اور سرمایہ کاروں کو ایک ہی چھت تلے سہولیات فراہم کرنے پر کام کر رہی ہے، صوبائی حکومت اپنی بجلی کی پیداوار کو سستی نرخ پر مقامی صنعتوں کو فراہم کرنے کے لئے اقدامات کر رہی ہے۔
