محکمہ لوکل گورنمنٹ نے پنجاب بھر کی 9 ڈویژنز کے مویشی منڈیوں کے تازہ ترین اعدادوشمار جاری کر دیئے ہیں۔ رپورٹ کے مطابق پنجاب کی 292 مویشی منڈیوں میں گزشتہ دورانیے میں 15 لاکھ سے زائد جانور منڈیوں میں لائے گئے جن میں سے 11 لاکھ سے زائد جانور فروخت ہوئے۔لاہور مویشی منڈیوں کی کارکردگی میں سب سے آگے ہے جہاں مجموعی طور پر 6.65 لاکھ جانور فروخت ہوئے، جن میں 4 لاکھ 43 ہزار چھوٹے جانور اور 2 لاکھ 22 ہزار بڑے جانور شامل ہیں۔فیصل آباد میں مجموعی طور پر 1 لاکھ 12 ہزار جانور منڈیوں میں لائے گئے جن میں سے 88 ہزار جانور فروخت ہوئے۔ بہاولپور ڈویژن میں بھی ایک لاکھ سے زائد جانوروں کی فروخت ریکارڈ کی گئی ہے۔ڈی جی خان ڈویژن میں 38 ہزار چھوٹے اور 30 بڑے جانوروں کی فروخت ہوئی جبکہ راولپنڈی میں 84 ہزار جانور منڈیوں میں لائے گئے جن میں سے 46 ہزار فروخت ہوئے۔ساہیوال میں 47 ہزار، سرگودھا میں 94 ہزار، گوجرانوالہ میں 10 ہزار اور ملتان میں 16 ہزار جانوروں کی خرید و فروخت ہوئی۔محکمہ بلدیات کی جانب سے مویشی منڈیوں میں صفائی، روشنی، اور جانوروں کی صحت کے حوالے سے بہترین انتظامات کو یقینی بنایا گیا۔ اس حوالے سے سیکرٹری بلدیات نے کہا ہے کہ ‘نو لاس نو پرافٹ’ کے اصول کے تحت عوام کو معیاری اور شفاف سہولیات فراہم کی گئیں تاکہ جانوروں کی خرید و فروخت میں سہولت اور اعتماد قائم رہے۔
