وزیر ہاؤسنگ اینڈ اربن ڈویلپمنٹ بلال یاسین سے ڈی جی پھاٹا سکندر ذیشان نے ملاقات کی۔ وزیر اعلیٰ پنجاب کے اپنی چھت ،اپنا گھر پروگرام کی پیش رفت بارے تفصیلی بریفنگ دی۔ پنجاب کے مستحق خاندانوں کے گھروں کی تعمیر کیلئے 188 ارب کی خطیر رقم کے بلاسود قرضے جاری کیے جاچکے ہیں۔ اب تک 87 ہزار سے زائد گھروں کی تعمیر مکمل جبکہ 45 ہزار گھر زیر تعمیر ہیں۔ 1 لاکھ 33 ہزار 990 مستحق خاندانوں کو قرض فراہم ،18 ہزار کے قریب افراد کو جلد بلاسود قرض کی فراہمی ہوگی۔ بریفنگ میں بتایا گیا کہ اب تک مستفید افراد کی جانب سے ماہانہ اقساط کی مد میں 9.67 ارب روپے جمع کروائی جاچکے ہیں۔ وزیر ہاؤسنگ اینڈ اربن ڈویلپمنٹ کا کہنا تھا کہ حکومت کا عزم ہے کہ ہر مستحق خاندان کو اپنی چھت فراہم کی جائے۔ کم آمدن والے افراد کو باعزت طریقے سے گھر بنانے کے قابل بنانا ترجیح ہے۔ وزیر اعلیٰ مریم نواز کی ہدایت پر خواتین، یتیموں اور کمزور طبقات کو اس اسکیم میں خصوصی ترجیح دی جارہی ہے۔ وزیر ہاؤسنگ بلال یاسین کا مزید کہنا تھا کہ قرضوں کو مرحلہ وار تعمیر سے منسلک کر کے فنڈز کے درست استعمال کو یقینی بنانا اصل کامیابی ہے۔
