وزیراعظم آزادکشمیر چوہدری انوارالحق نے مظفرآباد میں محکمہ برقیات کے لیے آپریشن ڈویژن مظفر آباد 2 کے منصوبے کی افتتاحی تقریب سے خطاب کرتے ہوئے کہا ہے کہ حکومت کی جانب سے دریاؤں اور ندی نالوں پر 144 نافذ ہے ، سیلفی کے چکر میں اپنی جان سے مت جائیے ، میں نے سختی سے انتظامیہ کو ہدایت کی ہے کہ اگر کوئی دریا کے کنارے کھڑے ہو کر سیلفی بنانا چاہتا ہے تو اسے فوری طور پر گرفتار کیا جائے ، وہ گرفتاری اس کی زندگی کی بحالی کے لیے ضروری ہے ، باقی عوام کو بھی یہ بتانے کی ضرورت ہے کہ طغیانی اور برسات کے موسم میں ندی نالوں کے قریب نہیں جانا ، دعاگو ہیں کہ سوات کی طرح کا سانحہ آزادکشمیر میں نہ ہو ، ابھی آپ نے دیکھا کہ پٹیالی کے مقام پر دو تین روز قبل رات کو بارش کی وجہ سے 200 سے 300 ٹورسٹ پھنس گئے تھے ، ایس ڈی ایم اے ، ضلعی انتظامیہ ، محکمہ شاہرات اور مسلح افواج پاکستان سمیت کوئی ایسا ادارہ نہیں تھا جس نے راتوں رات 20 سے 22 کلومیٹر سڑک بحالی میں کردار ادا نہ کیا ہو بلکہ پھنسے ہوئے تمام سیاحوں کو بروقت اقدامات سے بچالیا گیا ، اس کا مطلب یہ ہے کہ اگر حکومت ذمہ داری کے ساتھ کام کرے تو ضرور فرق پڑتا ہے ، ہم سب کو یہ کوشش کرنی ہے کہ محرم الحرام کے حوالے سے بھی اور آمدہ برسات، جس میں شدید بارشوں کی پیش گوئی کی گئی ہے ، اس کے حوالے سے بھی اپنے آپ کو ذہنی اور فکری طور پر تیار رکھناہے کہ کسی بھی ممکنہ ایمرجنسی کی صورت میں ہم ریلیف کے اداروں کے کام میں رکاوٹ نہ بنیں بلکہ ان کے معاون ثابت ہوں۔
