صوبائی ترقیاتی ورکنگ پارٹی کے اجلاس میں مختلف سیکٹرز کی ترقیاتی سکیموں کے لئے 12 ارب روپے سے زائد کے فنڈز کی منظوری

پنجاب پلاننگ اینڈ ڈویلپمنٹ بورڈ نے مالی سال 2025-26 کے صوبائی ترقیاتی ورکنگ پارٹی کے اجلاس میں مختلف سیکٹرز کی ترقیاتی سکیموں کے لیے 12 ارب روپے سے زائد کے فنڈز کی منظوری دے دی ۔ فنڈز کی منظوری صوبائی ترقیاتی ورکنگ پارٹی کے 13 ویں اجلاس میں دی گئی۔ اجلاس کی صدارت چیئرمین پی اینڈ ڈی بورڈ ڈاکٹر نعیم رؤف نے کی ۔ اجلاس میں جن منصوبوں کی منظوری دی گئی ان میں پنجاب میں گارمنٹس سٹیز کے قیام کے لیے4 ارب 18 کروڑ روپے ، ڈی ایچ کیوز اور ٹی ایچ کیوز ہسپتالوں کی ری ویمپنگ کے لیے پروجیکٹ مینجمنٹ یونٹ کے قیام کے لیے ایک ارب 71 کروڑ روپے ، پاپولیشن ویلفیئر ہاؤس کے قیام کے لیے ایک ارب 38 کروڑ ، ڈی جی خان میں چوکی والا سے اٹامک انرجی پروجیکٹ تک سڑک کی تعمیر و مرمت کے لیے ایک ارب 15 کروڑ اور خوشاب مظفرگڑھ روڈ ضلع جھنگ کی تعمیر و مرمت کے لیے 3 ارب 64 کروڑ روپے کی منظوری شامل ہے ۔ اجلاس میں سیکرٹری پی اینڈ ڈی رفاقت علی ، چیف اکانومسٹ مسعود انور،ممبران پی اینڈ ڈی بورڈ اور متعلقہ سیکٹرز کے افسران بھی شریک ہوئے۔