ضلعی انتظامیہ لاہور، ڈپٹی کمشنر سید موسیٰ رضا کی سربراہی میں، سیلاب متاثرین کی بحالی کے لیے دن رات کوشاں ہے۔ وزیراعلیٰ پنجاب مریم نواز شریف کی ہدایت پر انتظامیہ نے لاہور کے مختلف علاقوں میں قائم ریلیف کیمپس میں شہریوں کے لیے بہترین سہولیات یقینی بنائی ہیں۔ ڈپٹی کمشنر نے مراکہ اسکول، چونگ سینٹر اور رائیونڈ میں قائم کیمپس کا دورہ کیا، جہاں پاکستان آرمی، اسسٹنٹ کمشنرز، پی ڈی ایم اے اور ریسکیو 1122 کے ساتھ مل کر امدادی سرگرمیوں کا جائزہ لیا۔ ریلیف کیمپس میں متاثرین کو کھانا، دودھ، طبی امداد اور صاف ستھرے ماحول کی فراہمی جاری ہے۔
ڈی سی سید موسیٰ رضا نے ہدایت کی کہ تمام محکمے رابطہ کاری کو مضبوط رکھیں اور سہولیات کی بروقت فراہمی میں کوئی کمی نہ آنے دیں۔ انہوں نے صفائی کے اعلیٰ معیار کو برقرار رکھنے پر بھی زور دیا۔ انتظامیہ کی کوششوں سے کیمپس میں مقیم شہریوں کو بنیادی ضروریات پوری کی جا رہی ہیں، اور صورتحال بہتر ہونے پر متاثرین کو گھروں کو واپس بھیجنے کی تیاری کی جا رہی ہے۔ ضلعی انتظامیہ کی یہ کاوشیں شہریوں کے لیے امید کی کرن ثابت ہو رہی ہیں۔
