ایف ڈی اے کے مالیاتی امور کوجدید تقاضوں سے ہم آہنگ کرکے آن لائن سسٹم سے مربوط کر دیا گیا ہے جسے مزید بہتر بنانے کے لئے بتدریج ترقیاتی پہلوئوں سے ہمکنار کیا جا رہا ہے۔ ڈائریکٹر جنرل ایف ڈی اے محمد آصف چوہدری کے مشن کے مطابق متعارف کردہ جدید اصلاحات پر عملدرآمد کا جائزہ لینے کے لئے شعبہ فنانس کے افسران کا اجلاس منعقد ہوا جس میں ڈپٹی ڈائریکٹرز فنانس حمیرا اشرف، فیصل طارق بٹ، ڈپٹی ڈائریکٹر آئی ٹی عبد اللہ نور، اسسٹنٹ ڈائریکٹر ریکوری میاں اختر، فنانس اسسٹنٹ محمد بلال و دیگر افسران موجودتھے۔ اس موقع پر مالیاتی امور میں آن لائن سسٹم پر کامیابی سے عملدرآمد کے لئے مختلف امور زیر بحث آئے اور سٹاف کو تاکید کی گئی مختلف وصولوں اور ادائیگیوں میں شعبہ جاتی رپورٹس میں مکمل مطابقت ہونی چاہیئے۔ ڈپٹی ڈائریکٹر فنانس حمیرا اشرف نے کہا کہ جدید ٹیکنالوجی کی مدد سے وضع کردہ آن لائن نظام کی بدولت مالیاتی امور میں مکمل شفافیت اور سروسز ڈیلیوری میں مزید تیزی آئیگی۔ انہوں نے کہا کہ حسابات کو اپ ڈیٹ رکھنے کے حوالے سے یہ سسٹم انتہائی اہمیت و افادیت کا حامل ہے جسکی بدولت ریکارڈ کیپنگ میں نظم وضبط برقرار رکھا جا سکے گا۔ انہوں نے بتایاکہ مختلف فیسوں/واجبات کی وصولیوں کے لئے آن لائن سسٹم سے تمام حسابات میں مطابقت و شفافیت اور مختلف مدات میں ریونیو کے ریکارڈ کو فی الفور چیک کیا جا سکتا ہے جس سے کسی قسم کی بد نظمی یا بے قاعدگی کے احتمال کا خاتمہ ہو گیا ہے۔ ڈائریکٹر جنرل ایف ڈی اے محمد آصف چوہدری نے مالیاتی امور میں جدید اصلاحات وضع کرنے اور کامیابی سے عملدرآمد کے لئے شعبہ فنانس کے افسران اور انکی ٹیم کی کاوشوں کو سراہا ہے۔
فیصل آباد ڈویلپمنٹ اتھارٹی کے مالیاتی امور کوجدید تقاضوں سے ہم آہنگ کرکے آن لائن سسٹم سے مربوط کر دیا گیا
