کمشنر ڈیرہ اسماعیل خان ظفر الاسلام کی زیر صدارت ریچارج پاکستان پراجیکٹ کے حوالے سے اجلاس

کمشنر ڈیرہ اسماعیل خان ڈویژن ظفر الاسلام کی زیر صدارت ریچارج پاکستان پراجیکٹ کے حوالے سے ان کے دفتر میں اجلاس کا انعقاد کیا گیا۔ اجلاس میں ریجنل پولیس آفیسر سید اشفاق انور، سیکرٹری ٹو کمشنر سید باچا کے علاوہ ڈویژن بھر سے محکمہ جنگلات، ایریگیشن، سوشل ویلفیئر، ایگریکلچر و دیگر متعلقہ محکموں کے افسران نے شرکت کی۔اجلاس کے دوران کمشنر ڈیرہ کو ریچارج پاکستان پراجیکٹ جو کہ ورلڈ وائڈ فنڈ فار نیچر -پاکستان(WWF) کے تعاون سے شروع کیا جا رہا ہے سے متعلق تفصیلی بریفنگ دی گئی اور مختلف مطالبات اور تجاویز سے متعلق بھی بتایا گیا۔ مزید بتایا گیا کہ پراجیکٹ سے متعلق آگاہی سیشنز کا انعقاد بھی کیا جائے گا جس پر کمشنر ڈیرہ ظفر الاسلام نے کہا کہ جیسا کہ پوری دنیا سمیت پاکستان کو بھی کلائمیٹ چینج کے باعث مختلف خطرات کا سامنا ہے جن میں موسمیاتی تبدیلیاں، شدید بارشیں /سیلاب، وغیرہ شامل ہیں لہذا ایسی صورتحال سے نمٹنے اور مستقبل میں کلائمیٹ چینج کے خطرات سے نمٹنے اور ان کے تدار ک کیلئے ریچارج پاکستان پراجیکٹ کا آغاز کیا جا رہا ہے۔ انہوں نے کہا کہ اس پراجیکٹ کے تحت صوبہ خیبر پختونخوا میں 4اضلاع کو شامل کیا گیا ہے اور ان چاروں کا تعلق ڈیرہ اسماعیل خان ڈویژن سے ہے لہذا تمام متعلقہ محکمے باہمی تعاون کا مظاہرہ کریں اور جس محکمے کو جو ٹاسک سونپا جائے اس کی بروقت تکمیل کو یقینی بنایا جائے۔انہوں نے محکمہ سوشل ویلیفئر کے افسران کو ہدایت کی کہ ان جی اوز کی ویریفیکیشن، معیار اور ایس او پیز پر پورا اترنے کے حوالے سے رپورٹ فراہم کریں۔ انہوں نے مزید ہدایت کی کہ تمام ٹاسکس کو ڈیڈ لائن کے اندر مکمل کیا جائے اور اس سلسلے میں تساہل یا غفلت کو کسی صورت برداشت نہیں کیا جائے گا۔اسی طر ح ماہانہ بنیاد پر جائزہ اجلاس کا انعقاد کیا جائے گا اور جس محکمہ کے ذمہ جو ٹاسک ہو گا اس سے متعلق پوچھا جائے گا اور اس تمام پراجیکٹ کو ذاتی طور پر سپر وائز کروں گا تاکہ نہ صرف پراجیکٹ کو کامیاب بنایا جا سکے بلکہ عوام بھی جلد اس پراجیکٹ کے ثمرات سے مستفید ہو سکیں۔