فیصل آباد کی شہری آبادی کو صاف پانی کی فراہمی اور سیوریج کی صفائی کے لیے دو بڑے میگا پراجیکٹس کا آغاز کیا جارہا ہے۔ ان منصوبوں کے حوالے سے کمشنر فیصل آباد راجہ جہانگیر انور کو ایم ڈی واسا سہیل قادر چیمہ نے تفصیلی بریفنگ دی۔ اس موقع پر ایڈیشنل کمشنر کوآرڈی نیشن عامر رضا اور ڈپٹی مینجنگ ڈائریکٹر انجینئرنگ ثاقب رضا بھی موجود تھے۔بریفنگ میں بتایا گیا کہ واسا کی جانب سے شہریوں کو روزانہ 101 ملین گیلن صاف پانی فراہم کیا جارہا ہے، تاہم شہریوں کی بڑھتی ہوئی ضروریات کو مدنظر رکھتے ہوئے مزید 30 ملین گیلن روزانہ صاف پانی کی سپلائی کا منصوبہ شروع کیا جارہا ہے، جو ستمبر 2027 تک مکمل کرلیا جائے گا۔ اس کے ساتھ ہی 33 ملین گیلن روزانہ سیوریج پانی کی صفائی کے منصوبے پر بھی کام شروع کیا جارہا ہے۔یہ دونوں منصوبے 20 ارب روپے سے زائد کی لاگت سے مکمل کیے جائیں گے۔
بریفنگ کے دوران کمشنر فیصل آباد راجہ جہانگیر انور نے کہا کہ سیوریج واٹر ٹریٹمنٹ پلانٹ ملکی تاریخ میں اپنی نوعیت کا پہلا منصوبہ ہوگا، جس سے شہریوں کو ماحول دوست سہولیات میسر آئیں گی۔ انہوں نے اس بات پر زور دیا کہ شہریوں کو صاف پانی اور نکاسی آب کی بنیادی سہولیات کی فراہمی واسا کی اولین ترجیح ہونی چاہیے۔کمشنر فیصل آباد نے مزید ہدایت کی کہ واسا شہر کے سیوریج اور بارش کے پانی کی نکاسی کے لیے ایک جامع پلان جلد تیار کرے تاکہ بارشوں اور بڑھتی آبادی کے تناظر میں شہریوں کو مسائل سے نجات دلائی جا سکے۔
