سیکرٹری ہاؤسنگ نورالامین مینگل نے تھیم پارک سوسائٹی کا دورہ کیا، جہاں کمشنر لاہور ڈویژن مریم خان، ڈی سی لاہور سید موسیٰ رضا اور دیگر متعلقہ افسران بھی ان کے ہمراہ تھے۔سیکرٹری ہاؤسنگ نورالامین مینگل نے ریلیف آپریشن کے لیے تمام اخراجات تھیم پارک انتظامیہ کے اثاثوں سے پورے کرنے کی ہدایت کی۔
ڈی سی لاہور کو تھیم پارک مالک خوشی محمد کے تمام اثاثے قرق کرنے کی ہدایت کی گئی جبکہ گھروں کا سیفٹی سروے جلد مکمل کرنے کے احکامات بھی جاری کیے گئے۔غیر محفوظ رہائشی اور کمرشل عمارتوں میں متاثرین کی واپسی روکنے اور متاثرہ گھروں کی مرمت کے تخمینے پر مبنی تفصیلی رپورٹ تیار کرنے کی ہدایت دی گئی۔دریا سے ملحقہ نکاسی آب کے لیے بنائے گئے واٹر چینل کو مزید کشادہ اور گہرا کرنے اور مزید واٹر چینلز فوری بنانے کے احکامات دیے گئے۔گلیوں اور گھروں سے ڈی واٹرنگ مشینوں کے ذریعے نکاسی آب مکمل کرنے کی ہدایت کی گئی۔ترجمان محکمہ ہاؤسنگ کے مطابق تھیم پارک کی اونچی نیچی زمین کے باعث نکاسی آب میں مشکلات پیش آ رہی ہیں تاہم پانی کی سطح کم کرنے کے لیے ٹیمیں 24 گھنٹے کام میں مصروف ہیں۔مشینری اور عملہ مسلسل سرگرم عمل ہیں اور وزیر اعلیٰ پنجاب کی ہدایت کے مطابق متاثرین کی مشکلات کم کرنے کے لیے بھرپور اقدامات جاری ہیں۔
