ڈپٹی کمشنر لاہور سید موسیٰ رضا نے علی الصبح دوروں کے سلسلے میں تحصیل راوی کا تفصیلی دورہ کیا۔ انہوں نے بیگم کوٹ، جڑانوالہ روڈ اور سگیاں کے اطراف انتظامی امور کا جائزہ لیا۔ اس موقع پر ای ڈی سی جی، چیف آفیسر ایم سی ایل، اے سی راوی، واسا اور دیگر حکام بھی ہمراہ تھے۔ اے سی راوی نے ڈپٹی کمشنر لاہور کو انتظامی امور پر تفصیلی بریفنگ دی جبکہ سگیاں میں سیوریج اور واٹر سپلائی کا کام آئندہ دو ہفتوں میں مکمل کرنے کی یقین دہانی کرائی گئی۔ ڈپٹی کمشنر نے واسا اور ایم سی ایل حکام کو نکاسی آب و سیوریج کے مؤثر نظام کیلئے مربوط حکمت عملی اپنانے اور میونسپل خدمات کی بہتر فراہمی کیلئے باہمی کوآرڈینیشن کو مزید مضبوط کرنے کی ہدایت کی۔ ایل ڈبلیو ایم سی کو بغیر کسی وقفے کے روزانہ کی بنیاد پر صفائی یقینی بنانے جبکہ ایم سی ایل ریگولیشن ونگ کو ضلع بھر میں انسداد تجاوزات آپریشن بلاوقفہ جاری رکھنے کا حکم دیا گیا۔ ڈپٹی کمشنر لاہور نے واضح کیا کہ شہریوں کو میونسپل سروسز کی فراہمی ضلعی انتظامیہ کی اولین ترجیح ہے اور فرائض میں غفلت یا لاپرواہی دکھانے والے اہلکاروں کے خلاف زیرو ٹالرنس پالیسی اپنائی جائے گی۔
