وزیر اعلیٰ بلوچستان سرفراز احمد بگٹی کے ویژن اور ایڈمنسٹریٹر کوئٹہ مجیب الرحمٰن قمبرانی کے خصوصی ہدایت پر بلڈنگ رولز 2022 پر مکمل عملدرآمد کو یقینی بنانے کے لیے میٹروپولیٹن کارپوریشن کوئٹہ کی جانب سے شہر میں غیر قانونی اور غیر منظور شدہ تعمیرات کے خلاف جامع اور مؤثر کارروائیاں شروع کر دی گئی ہیں۔ایم سی کیو چیف انسداد تجاوزات سیل دلاور خان کی سربراہی میں شہر کے مختلف علاقوں میں تفصیلی معائنہ کرتے ہوئے متعدد خلاف ورزیاں بے نقاب کیں اور موقع پر ہی کارروائی عمل میں لائی گئی۔ترجمان میٹروپولیٹن کارپوریشن کے مطابق بلڈنگ رولز 2022 کی خلاف ورزی کرنے والی عمارتوں کی نشاندہی مندرجہ ذیل مقامات پر کی گئی:1. علی بھائی روڈ، سیوک سینٹر پلازہ کے قریب: خلاف ورزی: ڈبل بیسمنٹ، بغیر منظور شدہ نقشہ2. خداداد روڈ، دبئی میریج ہال کے سامنے: خلاف ورزی: بغیر منظور شدہ نقشہ3. کواری روڈ پلازہ: خلاف ورزی: ڈبل بیسمنٹ، اور بغیر منظور شدہ نقشہ4. مسجد روڈ، اپوا اسکول کے قریب پلازہ: خلاف ورزی: ڈبل بیسمنٹ اور بغیر منظور شدہ نقشہ
5. کریم الدین اسٹریٹ (گردت سنگھ روڈ) خلاف ورزی: بغیر منظور شدہ نقشہ6. مسجد روڈ پر متعدد دکانیں: خلاف ورزی: بغیر منظور شدہ نقشہ
میٹروپولیٹن کارپوریشن کوئٹہ کی جانب سے تمام غیر قانونی تعمیراتی سرگرمیوں کو فوری طور پر بند کر دیا گیا ہے جبکہ متعلقہ ذمہ داران کو نوٹسز جاری کر کے قانونی کارروائی کا آغاز کر دیا گیا ہے۔ایڈمنسٹریٹر میٹروپولیٹن کارپوریشن کوئٹہ کا کہنا ہے کہ غیر قانونی تعمیرات نہ صرف شہر کے حسن کو متاثر کرتی ہیں بلکہ عوامی سلامتی کے لیے بھی خطرہ بن سکتی ہیں، کوئٹہ چونکہ ایک حساس زلزلہ خیز (Seismic) زون میں واقع ہے، اس لیے بلڈنگ رولز 2022 کے تحت ڈبل بیسمنٹ کی تعمیر سختی سے ممنوع ہے، قانون کی عملداری، شہریوں کا تحفظ اور منظم شہری ترقی ہماری اولین ترجیح ہے۔انہوں نے مزید کہا کہ میٹروپولیٹن کارپوریشن کوئٹہ شہر کی محفوظ اور پائیدار تعمیر نو کے لیے ہمہ وقت سرگرم عمل ہے، اور بلڈرز، انجینئرز اور شہریوں سے اپیل کی کہ وہ تعمیرات سے قبل تمام قانونی تقاضے مکمل کریں تاکہ کوئٹہ کی ترقی مضبوط اور محفوظ بنیادوں پر جاری رہ سکے۔
