وزیر ہاؤسنگ پنجاب بلال یاسین اور چیئرمین واسا پنجاب چودھری شیر علی کی زیر صدارت گورننگ باڈی کا پہلا اجلاس ہوا ۔وائس چیئرمین لاہور واسا چودھری شہباز ،ڈی جی واسا طیب فرید، ایڈیشنل سیکرٹری ہاؤسنگ ، ایڈیشنل سیکرٹری محکمہ خزانہ، ٹیکنیکل ممبران اور 19 اضلاع کے واسا ایم ڈیز نے شرکت کی۔ اجلاس میں پنجاب کے38 اضلاع میں واسا جبکہ 3 میں سب واساز کے قیام کو 31 دسمبر تک مکمل فعال کرنے کی ڈیڈ لائن مقرر کرنے کا فیصلہ کیا گیا۔
اجلاس میں تمام اضلاع کے واساز میں یکساں واٹر ٹیرف کا نفاذ کا اصولی فیصلہ کیا گیا۔ پنجاب واسا کے اخراجات کی تکمیل کیلئے تمام واساز کے محصولات کا ایک فیصد جمع کروایا جائے گا۔ مرکزی کمانڈ اینڈ کنٹرول سسٹم ،لائیو ڈیش بورڈ ، رین گیجز اور سکارڈا سسٹم کی تنصیب یقینی بنائی جائے گی۔ واٹر سپلائی، سیوریج اینڈ ڈرینج قوانین 2025 کی سفارشات کا جائزہ لیتے ہوئے کمیٹی کو ارسال کرنے پر اتفاق کیا گیا۔ چیئرمین واسا پنجاب چودھری شیر علی خان نے بتایا کہ اتھارٹی امور میں قوانین سازی اور اصلاحات کیلئے ابتدائی طور پر تین کمیٹیاں تشکیل دی گئی ہیں۔ وزیر ہاؤسنگ بلال یاسین کا کہنا تھا کہ وزیر اعلیٰ پنجاب کی ہدایت پر عوامی مسائل کے بروقت تدارک کو تمام اضلاع میں یقینی بنایا جائے گا۔ واسا پنجاب کو جدید خطوط پر استوار کرنا اور ریونیو کولیکشن میں شفافیت اولین ترجیح ہے۔
