کراچی(بلدیات ٹائمز)میئر کراچی بیرسٹر مرتضیٰ وہاب کی صدارت میں صدر دفتر بلدیہ عظمیٰ کراچی میں محکمہ انجینئرنگ کا اعلیٰ سطحی اجلاس منعقد ہوا، جس میں شہر بھر میں جاری ترقیاتی منصوبوں کی پیشرفت کا جائزہ لیا گیا، اجلاس کے دوران میئر کراچی نے شہر کی مرکزی شاہراہوں کی نگرانی کے لیے فوری طور پر خود مختار ویجیلنس ٹیمیں تشکیل دینے کی ہدایت کی، ان ٹیموں کی ذمہ داری ہوگی کہ وہ چھوٹے اور درمیانے درجے کی مرمتی شکایات کی نشاندہی کریں اور انہیں 24 گھنٹوں کے اندر حل کریں،میئر کراچی نے کہا کہ معمولی مرمتی کاموں کے لیے علیحدہ ایمرجنسی ٹینڈرز پہلے ہی جاری کیے جا چکے ہیں اور ان کے لیے بلدیاتی ٹیکسز سے فنڈز مختص ہیں، انہوں نے واضح کیا کہ جب وسائل اور فنڈز دونوں دستیاب ہیں تو شکایات کے حل میں کسی قسم کی تاخیر برداشت نہیں کی جائے گی، ویجیلنس ٹیمیں باقاعدگی سے سڑکوں کا دورہ کریں گی
، پیشرفت رپورٹ مرتب کریں گی اور عوامی شکایت یا اطلاع کا انتظار کیے بغیر براہِ راست اعلیٰ حکام کو آگاہ کریں گی،میئر کراچی نے کہا کہ سڑکوں سے متعلق معمولی مسائل کی نشاندہی اور رپورٹنگ شہریوں نہیں بلکہ افسران کی ذمہ داری ہے، ہر ضلع میں ایک فعال ویجیلنس ٹیم ہونی چاہیے تاکہ مسائل کو چوبیس گھنٹوں کے اندر حل کیا جا سکے، انہوں نے کہا کہ مقررہ وقت کے اندر مسائل حل نہ ہونے یا ہدایات پر عملدرآمد نہ ہونے کی صورت میں محکمہ انجینئرنگ کے خلاف سخت کارروائی کی جائے گی،اجلاس میں افسران نے ڈسٹرکٹ سالانہ ترقیاتی پروگرام (ADP)، صوبائی ADP اور CLICK کے تحت جاری منصوبوں کی پیشرفت سے آگاہ کیا، سینئر انجینئرنگ افسران نے بتایا کہ CLICK فنڈنگ کے تحت جاری میگا منصوبے تکمیل کے آخری مراحل میں ہیں اور ان پر 70 فیصد سے زائد کام مکمل ہو چکا ہے، جبکہ ان میں سے متعدد منصوبوں کا افتتاح مارچ سے قبل متوقع ہے،انہیں مزید بتایا گیا کہ صوبائی ADP اسکیموں کے لیے دو سہ ماہیوں کے مختص فنڈز تقریباً مکمل طور پر استعمال ہو چکے ہیں اور باقیماندہ کام مقررہ مدت کے اندر مکمل کیا جا رہا ہے، میئر کراچی نے ناتھا خان روڈ اور جہانگیر روڈ کی اسکیموں سے متعلق تمام قانونی اور ضابطہ جاتی کارروائیاں تیزی سے مکمل کرنے کی ہدایت کی،شفافیت، بروقت تکمیل اور جوابدہی پر زور دیتے ہوئے میئر کراچی بیرسٹر مرتضیٰ وہاب نے کہا کہ شہریوں کو ہم سے بہت توقعات ہیں اور ہم نے شہر بھر میں عملی بہتری کی فراہمی کا آغاز کر دیا ہے، ہماری توجہ بروقت عملدرآمد، شفافیت اور واضح پیشرفت پر مرکوز ہے، اجلاس میں میونسپل کمشنر کے ایم سی ایس ایم افضل زیدی (پی اے ایس)، مشیرِ مالیات کے ایم سی گلزار ابڑو، سینئر ڈائریکٹر انجینئرنگ جنید اللہ خان، سینئر ڈائریکٹر کوآرڈینیشن ٹو میئر کراچی اخلاق احمد سمیت دیگر سینئر افسران نے شرکت کی۔
