ڈی سی لاہور کیپٹن (ر) محمد علی اعجاز کی سربراہی میں ضلعی انتظامیہ لاہور لاہور نے وزیراعلیٰ پنجاب مریم نواز شریف کے ویژن کی روشنی میں تین روزہ "محفوظ بسنت” فیسٹیول کا شاندار اور کامیاب انعقاد کر کے ایک نئی مثال قائم کر دی ہے۔ اس میگا ایونٹ میں نہ صرف مقامی شہریوں بلکہ بین الاقوامی اور قومی مہمانوں کی ایک بڑی تعداد نے بھرپور شرکت کی اور لاہور کی روایتی زندہ دلی اور مہمان نوازی کا لطف اٹھایا۔ ڈپٹی کمشنر لاہور کیپٹن (ر) محمد علی اعجاز کی ذاتی نگرانی اور سخت مانیٹرنگ کی بدولت پورا تہوار انتہائی پرامن اور محفوظ رہا، جس کے لیے ضلعی انتظامیہ لاہور کی فیلڈ ٹیموں نے دن رات کام کیا۔ ڈپٹی کمشنر نے اس موقع پر واضح کیا کہ اس فیسٹیول کا مقصد ثقافت کی بحالی کے ساتھ ساتھ شہریوں کے لیے معاشی سرگرمیوں کے نئے مواقع پیدا کرنا تھا، جس میں مریم نواز شریف کے تعاون سے مکمل کامیابی حاصل ہوئی ہے۔ غیر ملکی مہمانوں کی آمد سے دنیا بھر میں پاکستان کا امن پسند اور ثقافت دوست چہرہ سامنے آیا ہے۔ فیسٹیول کے اختتام پر ڈی سی لاہور نے فوری طور پر شہر بھر میں صفائی ستھرائی کے خصوصی انتظامات اور ٹریفک کی روانی کو معمول پر لانے کی ہدایات جاری کیں، جبکہ انہوں نے تمام ٹیموں کی کارکردگی کو سراہتے ہوئے کہا کہ آئندہ کے لیے اس کامیاب ماڈل کی روشنی میں مزید بہتر حکمت عملی تیار کی جائے گی تاکہ سیاحت اور سرمایہ کاری کے مزید راستے کھل سکیں۔ لاہور نے ایک بار پھر ثابت کر دیا ہے کہ یہ شہر امن، محبت اور ثقافتی ورثے کا حقیقی گہوارہ ہے۔
ڈی سی لاہور کی فیلڈ ٹیموں کی حوصلہ افزائی،بسنت فیسٹیول کے اختتام پر شہر کی فوری صفائی اور ٹریفک روانی برقرار رکھنے کے احکامات
