وزیراعلٰی مریم نواز کے مثالی گاؤں پروگرام کے تحت 302 دیہات میں ترقیاتی منصوبوں پر کام شروع کر دیا گیا ہے۔ اس حوالے سے ایک اجلاس کے دوران وزیر بلدیات ذیشان رفیق کو پنجاب رورل میونسپل سروسز کمپنی (پی آر ایم ایس سی) کی جانب سے بریفنگ دی گئی۔ سپیشل سیکرٹری (ڈویلپمنٹ) آسیہ گل اور پی آر ایم ایس سی کے سی ای او خرم پرویز بھی موجود تھے جبکہ وزیراعلی آفس کے سیکرٹری کوآرڈینیشن خصوصی طور پر بذریعہ ویڈیو لنک شریک ہوئے۔وزیر بلدیات ذیشان رفیق نے کہا کہ وزیراعلٰی نے ابتدائی طور پر 485 دیہات میں سکیموں کے اجرا کی منظوری دی تھی۔ اب تک 464 دیہات کیلئے متعلقہ ڈسٹرکٹ ڈویلپمنٹ کمیٹیاں منظوری دے چکی ہیں۔ پی آر ایم ایس سی نے 357 دیہات کے لئے ورک ایوارڈ کر دیا ہے جبکہ کنٹریکٹرز نے 302 دیہات میں ذمہ داریاں بھی سنبھال لی ہیں۔ صوبائی وزیر نے مثالی گاؤں پروگرام کی مانیٹرنگ کیلئے ڈیش بورڈ بنانے کی ہدایت کرتے ہوئے کہا کہ پی آر ایم ایس سی نے 22 ہزار 986 دیہات میں 41 ہزار چھپڑوں کی موجودگی کا تخمینہ لگایا ہے۔ دیہات کے روایتی چھپڑوں کی بحالی کے ساتھ واٹر ٹریٹمنٹ پلانٹ لگایا جائے گا تاکہ پانی کے ان ذخائر میں صحتمند ایکواکلچر پروان چڑھتا رہے۔ انہوں نے کہا کہ مثالی گاؤں پروگرام کو مرحلہ وار مکمل کیا جائے گا۔ فیز ون میں 8 ہزار دیہات شامل کئے جا رہے ہیں۔ ہماری کوشش ہے کہ ہر صوبائی حلقے کے کم از کم 50 دیہات پہلے مرحلے سے مستفید ہوں۔ وزیر بلدیات نے کہا کہ "مریم نواز کا سوہنا پنجاب” پروگرام دیہات کو ایک نیا روپ دے گا۔ گلیوں، ڈرینز اور پارکس کی تعمیر کے ساتھ 200 دیہات میں واٹر سکیم بھی دیں گے۔ اجلاس میں چھپڑوں کی زمین پر تجاوزات کے خاتمے کی مہم چلانے کا بھی فیصلہ کیا گیا۔ صوبائی وزیر نے متعلقہ ڈپٹی کمشنرز کو تجاوزات ہٹانے کا ٹاسک سونپنے کی ہدایت کرتے ہوئے کہا کہ مثالی گائوں پروگرام سے دیہات کا قابل اعتماد ڈیٹا بیس بھی بن رہا ہے۔ ذیشان رفیق نے کہا کہ وزیراعلی دیہات میں شہروں کے برابر سہولیات کی فراہمی چاہتی ہیں۔ وزیر بلدیات نے اب تک کی پیشرفت پر اطیمنان کا اظہار کرتے ہوئے کہا کہ سکیموں پر کام کے ہر مرحلے میں معیار اور شفافیت کا لازمی خیال رکھا جائے۔
مریم نواز کا مثالی گاؤں پروگرام: 302 دیہات میں کام شروع،464 دیہات کی سکیموں کی ڈی ڈی سیزمنظوری دے چکی،ذیشان رفیق
