وزیر بلدیات پنجاب ذیشان رفیق کی زیر صدارت سول سیکرٹریٹ میں ایک اجلاس کے دوران پنجاب ڈویلپمنٹ پروگرام (پی ڈی پی) میں پیشرفت کا جائزہ لیا گیا جبکہ پراجیکٹ ڈائریکٹر نے بریفنگ دی۔وزیر بلدیات ذیشان رفیق نے کہا کہ "مریم نواز کا سوہنا پنجاب” پروگرام کے تحت محکمہ لوکل گورنمنٹ کی زیر نگرانی 51 شہروں میں کام جاری ہے۔ محکمہ بلدیات نے شفاف ٹینڈرنگ کے ذریعے اب تک مختلف سکیموں میں 28 ارب روپے کی بچت کی۔ انہوں نے کہا کہ شہروں کے لئے 55 میں سے 46 سکشن مشینوں کا آرڈر دے دیا گیا ہے۔ علاوہ ازیں 55 جیٹنگ مشینوں اور 100 ڈی واٹرنگ سیٹس کی خریداری کا عمل بھی جاری ہے۔ ذیشان رفیق نے کہا کہ پی ڈی پی کے تحت 77 ڈی سلٹنگ مشینوں کی خریداری بھی آخری مراحل میں ہے۔ جدید مشینوں کے انتظام سے اربن فلڈنگ کی روک تھام میں مدد ملے گی۔ انہوں نے کہا کہ وزیراعلی مریم نواز کی ہدایت پر شہروں میں زیر زمین واٹر سٹوریج ٹینکس کا جال بچھایا جا رہا ہے۔ سڑک کنارے انڈر گرائونڈ واٹر ٹینکس کی تعمیر سے برساتی پانی کی فوری نکاسی ممکن ہوگی۔ ذخیرہ شدہ پانی کو بوقت ضرورت استعمال بھی کیا جا سکے گا۔
وزیر بلدیات نے کہا کہ سیوریج اور ڈرین کا منظم سسٹم آنے سے شہریوں کو زبردست ریلیف ملے گا۔ 61 ڈسپوزل سٹیشنز کی بحالی کے ساتھ 56 نئے ڈسپوزل سٹیشنز بنائے جائیں گے۔ پی ڈی پی کے تحت شہروں کیلئے 2050 تک کی ضروریات کے تحت جامع ماسٹر پلاننگ کی گئی ہے۔ انہوں نے کہا کہ لائننگ پائپ کے لئے ٹیکنالوجی پاکستان منتقلی کی گئی ہے اور مختلف شہروں میں پلانٹ نصب ہو رہے ہیں۔
