عید الاضحٰی پابندیاں،محکمہ بلدیات پنجاب کے نوٹیفکیشن کے برعکس اضلاع کی انتظامیہ اور پیرا فورس نے کارخانوں اور کاروباری لوگوں کو ہدف بنا لیا،عام شہری بھی پریشان

محکمہ بلدیات کی جانب سے جاری نوٹیفکیشن جو ہر سال جاری ہوتا ہے میں عید الاضحیٰ کے موقع پرپنجاب بھر میں سری پائے جلانے اور بھوننے پر مکمل پابندی عائد کی گئی ہے۔پنجاب بھر میں دفعہ 144 کے تحت سری پائے جلانے اور بھوننے پر سخت پابندی لگائی گئی ہے۔جس کی وجہ یہ بتائی گئی ہے کہ عوامی مقامات پر سری پائے جلانے سے شدید ماحولیاتی آلودگی اور زہریلا دھواں پیدا ہوتا ہے۔اس نوٹیفکیشن کا غلط استعمال کرتے ہوئے لاہور سمیت مختلف اضلاع کی انتظامیہ کی جانب سے پیرا فورس اور بلدیاتی اداروں کے ساتھ ملکر قربانی کے جانوروں کا خام مال فروخت کرنے،خریدنے اور کارخانوں میں پراسس کرنے والوں کو ہدف بنا لیا گیا ہے۔چھاپے مار کر مقدمات بنائے جا رہے ہیں کارخانوں کو مسمار جبکہ سامان بھی سرکاری طور پر توڑا اور ضبط کیا جا رہا ہے۔سرکاری طور پر بھتہ وصولی کی بھی شکایات سامنے آ رہی ہے۔اداروں کی نااہلی اور کوآرڈینیشن کے فقدان کے باعث عیدالاضحٰی کے قبل اس کاروبار سے منسلک افراد کو این او سی جاری نہیں کیا جا رہا ہے۔جس سے سالانہ اربوں روپے کا کام کرنے والی انڈسٹری کا کوئی پرسان حال نہیں۔اہم بات یہ ہے کہ محکمہ بلدیات پنجاب کے نوٹیفکیشن کی مرضی سے تشریح اور مطلب نکال کر کارروائیوں کی وجہ سے حکومتی اداروں نے عام شہریوں کے لئے بھی پریشانی پیدا کر دی ہے۔قربانی کے جانوروں کا گوشت فروخت نہیں ہو سکتا۔سری پائےاور دیگر حلال گوشت لوگ کس طرح تیار کر کے کھائے یا محفوظ کریں۔پیرا کو ایک بدمعاش ادارہ بنا دیا گیا ہے جو لوکل گورنمنٹ، ضلعی انتظامیہ، محکمہ ماحولیات،محکمہ لائیوسٹاک اور دیگر سے زیادہ طاقتور ہو چکا ہے۔کھالیں اکھٹی کرنے والے مدارس الگ تشویش میں مبتلا ہیں۔قصاب الگ پریشان ہیں کہ ان سے چربی وغیرہ کون خریدے گا۔صورتحال یہی رہی تو یہ سارے حلال قربانی کے جانوروں کے حصے ویسٹ کرنے کے علاوہ لوگوں کے پاس کوئی چارہ نہیں رہے گا۔ستھرا پنجاب ایجنسیز کوڑا اور فضلہ اکٹھا کرنے کے ساتھ ساتھ جانوروں کے کھالیں،چربی،رودے، سری پائے اور دیگر بھی ڈمپنگ گراؤنڈ میں پھینکیں گی۔عام شہریوں کو نااہل بیوروکریسی کی بھینٹ چڑھا کر عید الاضحٰی پر قربان کیا جا رہا ہے۔جانوروں کے خام مال کا کاروبار کرنے والوں کو نہ تو ضلعی انتظامیہ این او سی دے رہی ہے نہ ہی محکمہ بلدیات یا بلدیاتی ادارے تعاون کر رہے ہیں۔متاثرین نے وزیر اعلٰی پنجاب مریم نواز شریف سے صورتحال کا نوٹس لینے کا مطالبہ کیا ہے۔