ڈی جی ستھرا پنجاب اتھارٹی بابر صاحب دین کی ہدایت پر عید قرباں کے موقع پر شہر بھر میں خصوصی صفائی آپریشن جاری ہے۔صفائی ستھرائی پر مامور ستھرا پنجاب ایجنسی لاہور کے عملے کی چھٹیاں منسوخ کر دی گئی ہیں۔اتوار کے روز بھی صفائی عملہ فیلڈ میں متحرک رہا۔شہر کے داخلی و خارجی راستوں سمیت بس اسٹینڈز، لاری اڈوں، کمرشل مارکیٹس اور عوامی رش کے مقامات پر اضافی عملہ تعینات رہا جبکہ شہر میں نصب 7000 سے زائد ویسٹ کنٹینرز کی کلئیرنس کا عمل بھی یقینی بنایا گیا۔لاہور کی تمام یونین کونسلز میں گھر گھر سے ویسٹ کولیکشن یقینی بنانے کے لیے لوڈر رکشے تعینات رہے۔صفائی آپریشن کے دوران مشینری کو فعال رکھنے کے لیے ورکشاپ کا عملہ تینوں شفٹوں میں موجود ہے جبکہ شہر بھر کی مویشی منڈیوں میں صفائی عملہ اور مشینری موجود ہے۔ مویشی منڈیوں کے اندر اور اطراف میں واشر رکشوں اور واشر گاڑیوں کی مدد سے پانی کا چھڑکاؤ بھی کیا جا رہا ہے۔جبکہ شہریوں میں قربانی کے جانوروں کی آلائشوں کو ویسٹ بیگز میں ڈال کر مناسب طریقے سےٹھکانے لگانے سے متعلق آگاہی سرگرمیوں کا انعقاد بھی کیا جا رہا ہے۔ڈی جی ستھرا پنجاب اتھارٹی بابر صاحب دین کا شہر لاہور میں جاری صفائی آپریشن کے حوالے سے کہنا ہے کہ وزیر اعلیٰ پنجاب مریم نواز شریف کے ویژن ستھرا پنجاب کے تحت ستھرا پنجاب ایجنسی لاہور کے 23 ہزار سے زائد سینٹری ورکرز، ڈرائیورز اور سپورٹ اسٹاف کو عید قرباں سے قبل تنخواہوں کی ادائیگی کر دی گئی ہے۔جبکہ ستھرا پنجاب ایجنسی لاہور کی صفائی ٹیمیں شہر بھر کی تمام یونین کونسلز میں زیرو ویسٹ ایکٹیویٹیز پر مامور ہیں۔صفائی ورکرز کی حاضری اور آپریشنل گاڑیوں کی باقاعدہ ٹریکنگ کو بھی یقینی بنایا جا رہا ہے۔شہریوں کی شکایات کے فوری ازالے کے لیے ستھرا پنجاب کی ہیلپ لائن 1139 بھی چوبیس گھنٹے فعال ہے۔
