لاہور(بلدیات ٹائمز ڈاٹ کام)بلدیہ عظمٰی لاہور کو ٹی ٹی آئی پی ٹیکس اور نقشہ فیس کی مد میں ریکارڈ آمدن وصول ہوئی ہے۔جنرل بس اسٹینڈ کی آمدن میں بھی ریکارڈ اضافہ ہوا ہے۔لاہور پارکنگ کمپنی کی طرف سے پارکنگ فیس کا شیئر ادا نہ کرنے کی وجہ سے اس مد میں آمدن زیرو ہے۔ٹی ٹی آئی پی ٹیکس کی مد میں رواں سال ہدف 6 ارب 60 کروڑ روپے تھا جبکہ یکم جون تک کے اعداد و شمار کے مطابق 6 ارب 5 کروڑ روپے کے مقابلے میں 8 ارب 15 کروڑ روپے کی ریکارڈ آمدن ہوئی ہے۔ریکوری 135 فیصد ہے۔نقشہ فیس جس کا سالانہ ہدف 40 کروڑ روپے ہے۔یکم جون تک 36 کروڑ 71 لاکھ روپے کے ہدف پر 35 کروڑ 20 لاکھ روپے جمع ہوئے ہیں۔نقشہ فیس کی ابتدائی 11 ماہ میں ریکوری 11 فیصد ہے تاہم شعبہ پلاننگ کے مطابق اب تک 39 کروڑ روپے وصول کئے جا چکے ہیں اور رواں ماہ کے آخر تک 100 فیصد سے زائد ریکوری کو یقینی بنایا جائے گا۔اس سے قبل نقشہ فیس کی مد میں ایم سی ایل 20 کروڑ روپے کے قریب تک ہی ریونیو حاصل کر سکی تھی۔انفورسمنٹ فائن کی آمدن ریکارڈ میں زیرو ہے۔میٹروپولیٹن آفیسر پلاننگ ڈاکٹر رائے امتیاز حسن کے مطابق نقشہ فیس کی مدمیں 15 جون تک آمدن 39 کروڑ 18 لاکھ روپے سے زائد ہو گئی ہے۔
