شدید بارشوں کے دوران صفائی انتظامات کا جائزہ لینے کیلئے ڈی جی ستھرا پنجاب اتھارٹی عمر جاوید کا گوجرانوالہ کا دورہ

لاہور سمیت پنجاب بھر میں مون سون کی شدید بارشوں کے دوران صفائی کے بہترین انتظامات یقینی بنانے کے لیے ستھرا پنجاب ٹیمیں فیلڈ میں متحرک ہیں۔ وزیر اعلیٰ پنجاب مریم نواز شریف کی ہدایت پر ڈی جی ستھرا پنجاب اتھارٹی عمر جاوید پنجاب بھر کے مختلف علاقوں کے دورے کر کے صفائی آپریشنزکا جائزہ لے رہے ہیں۔ ڈی جی ستھرا پنجاب اتھارٹی عمر جاوید مون سون کی شدید بارشوں کے دوران صفائی انتظامات کا جائزہ لینے کے لیے گوجرانوالہ پہنچ گئے، جہاں ایم ڈی گوجرانوالہ عبدالرزاق ڈوگر نے انہیں شہر میں جاری بارش کے بعد صفائی انتظامات بارے بریفنگ دی۔ ڈی جی ستھرا پنجاب نے ستھرا پنجاب ایجنسی گوجرانوالہ کے کنٹرول روم کا بھی دورہ کیا اور گزشتہ 24 گھنٹوں کے دوران موصول ہونے والی شہری شکایات کا جائزہ لیا۔ ڈی جی عمر جاوید نے متعلقہ افسران کو ہدایت کی کہ بارشوں کے موسم میں شہریوں کی شکایات کے فوری ازالے کو یقینی بنایا جائے جبکہ چوکنگ پوائنٹس، اہم شاہراہوں اور عوامی مقامات پر خصوصی صفائی ٹیموں کی تعیناتی کے ذریعے صفائی آپریشن کو مزید مؤثر کیاجائے۔ ڈی جی ستھرا پنجاب اتھارٹی عمر جاوید کا کہنا تھا کہ مون سون بارشوں کے دوران شہریوں کو صاف ستھرا ماحول فراہم کرنے کے لیے تمام وسائل بروئے کار لائے جا رہے ہیں۔ وزیر اعلیٰ پنجاب مریم نواز شریف کے ویژن ستھرا پنجاب کے تحت عوام کو بہترین اور بروقت صفائی سہولیات کی فراہمی کے لیے پرعزم ہیں۔