*وزیراعلیٰ امجد حسین نے گلگت شہر کی مختلف شاہراہوں پر میٹلنگ کے کام کا افتتاح کر دیا*

وزیراعلیٰ گلگت بلتستان امجد حسین نے گلگت شہر کی مختلف شاہراہوں پر میٹلنگ کے کام کا افتتاح کر دیا۔ اس موقع پر میڈیا سے گفتگو کرتے ہوئے وزیراعلیٰ نے کہا کہ گلگت شہر میں گزشتہ دو سال سے سیوریج کا منصوبہ جاری ہے، جس کے باعث شہر کی بیشتر شاہراہیں متاثر ہوئیں اور سڑکوں کی کھدائی کے باعث شہریوں کو مشکلات کا سامنا کرنا پڑا۔ سیوریج کا منصوبہ تکنیکی اعتبار سے ایک مشکل کام ہے۔ اس منصوبے پر تیزی سے کام جاری ہے۔ سیوریج منصوبے میں سڑکوں کی بحالی اور ری کارپٹنگ شامل تھی، تاہم اس کے باوجود گلگت شہر میں تقریباً 80 کلومیٹر سڑکوں کی دوبارہ تعمیر اور ری کارپٹنگ کی ضرورت ہے۔ این ایل سی اور صوبائی حکومت ان شاہراہوں کی ری کاپٹنگ کے منصوبے کو مکمل کریں گے۔ جن سڑکوں کو NLC کے منصوبے کے دوران کھودا گیا تھا، ان میں سے بعض کی بحالی صوبائی حکومت اپنے بجٹ سے کررہی ہے۔ وٹرنری ہسپتال تا ڈی آفس تک روڈ اور ریاض روڈ کی میٹلنگ مکمل ہونے کے بعد ان کا افتتاح کیا گیا ہے۔ شہر کی دیگر اہم شاہراہوں پر بھی آئندہ چند روز میں ری کاپٹنگ کا کام مکمل کیا جائے گا۔ پونیال روڈ سے شوٹی تک سڑک کا منصوبہ پر بھی میٹلنگ کا کام آخری مراحل میں ہے۔ گلگت شہر کے مختلف محلوں کی سڑکوں کی بھی مرحلہ وار مرمت اور ری کارپٹنگ کی جائے گی۔ حکومت کی کوشش ہے کہ آئندہ سات سے آٹھ ماہ کے دوران گلگت شہر کی تمام اہم سڑکوں کی مرمت اور ری کارپٹنگ کا کام مکمل کی جائے تاکہ دارالحکومت ایک منظم اور بہتر شہر کے طور پر نظر آئے۔ سڑکوں کے شولڈرز کو بھی مضبوط بنانے پر توجہ دی جا رہی ہے تاکہ بار بار سڑکوں کو نقصان نہ پہنچے اور تعمیر شدہ سڑکیں زیادہ عرصے تک قابل استعمال رہیں۔حکومت گلگت شہر کے ساتھ ساتھ دیامر اور بلتستان کے اہم شاہراہوں کو بہتر بنانے پر توجہ دے رہی ہے۔ دیامر اور بلتستان میں مختلف ترقیاتی منصوبے جاری ہیں۔وزیراعلیٰ نے کہا کہ گلگت بلتستان کے تمام ضلعی ہیڈکوارٹرز کو بھی مرحلہ وار بہتر بنایا جائے گا، کیونکہ بہتر شہری سہولیات نہ صرف مقامی آبادی بلکہ ملکی و غیر ملکی سیاحوں کے لیے بھی ضروری ہیں۔ سیاحت کے فروغ کے لیے شہروں اور سیاحتی مقامات تک بہتر سڑکوں اور بنیادی سہولیات کی فراہمی حکومت کی ترجیحات میں شامل ہے۔گلگت بلتستان کی بڑی شاہراہوں کی صورتحال پہلے کے مقابلے میں بہتر ہورہی ہے۔ جگلوٹ، سکردو روڈ کو بھی قدرتی حادثات سے محفوظ بنانے کیلئے کام شروع کیا جا رہا ہے۔ وزیر اعلیٰ نے کہاکہ گلگت، شندور روڈ پر کام جاری ہے۔استور ویلی روڈ اور شغرتھنگ روڈ کو بھی بہتر بنائیں گے۔ اسی طرح خپلو، کھرمنگ اور شگر کے علاقوں کیلئے بھی بہتر ذرائع نقل و حمل کو یقینی بنائیں گے۔مستقبل میں مرکزی شاہراہوں سے سیاحتی مقامات اور دور دراز علاقوں تک بہتر بنانے کیلئے خصوصی اقدامات کررہے ہیں۔حکومت گلگت بلتستان کے تمام آبادی والے علاقوں میں بنیادی سہولیات کی فراہمی اور سڑکوں کے نظام کو بہتر بنانے کے لیے اقدامات کر رہی ہے۔وزیراعلیٰ نے کہا کہ ترقیاتی منصوبوں کی تکمیل میں بعض مقامات پر بجٹ کی کمی کا سامنا ہے، تاہم وفاقی حکومت کے ساتھ اس حوالے سے بات کی جارہی ہیں۔ امید ہے کہ گلگت بلتستان کے لیے مختص بقایا فنڈز بھی فراہم کیے جائیں گے تاکہ صوبے میں تعمیر و ترقی کا عمل مطلوبہ رفتار سے جاری رکھا جا سکے۔