لاہور کی چار تحصیلوں میں اسسٹنٹ کمشنرز کی سربراہی میں ماحولیاتی تحفظ ایجنسی و پیرا فورس کی مشترکہ ٹیموں کا کریک ڈاون

کمشنرلاہورڈویژن مریم خان کی ہدایات کے مطابق ماحولیاتی تحفظ سنگل یوز پلاسٹک رولز 2023 کے تحت کاروائیاں/ کریک ڈاؤن جاری ہے۔ لاہور کی چار تحصیلوں میں اسسٹنٹ کمشنرز کی سربراہی میں ماحولیاتی تحفظ ایجنسی و پیرا فورس کی مشترکہ ٹیموں نے کریک ڈاون کیا۔ ٹیموں نے 55مقامات و مارکیٹس میں انسپیکشنز کیں اور خلاف قانون 751کلو پلاسٹک بیگز ضبط کیے۔ ٹیموں نے خلاف قانون پلاسٹک بیگز فروخت کنندگان کو 25ہزار روپے جرمانہ بھی عائد کیا۔کمشنرلاہورڈویژن مریم خان کا کہنا ہے کہ 75مائیکرون سے کم وزن پلاسٹک بیگز کے خلاف سخت کریک ڈاون جاری رہیگا، لاہور کی چار تحصیلوں میں کریک ڈاون کا آغاز ہو گیا ہے ضبطی و جرمانوں کے علاوہ سربمہری بھی ہوگی۔ انہوں نے کہا کہ خلاف قانون پلاسٹک بیگز ماحولیاتی آلودگی و دیگر مسائل کا سبب ہیں۔ کمشنر لاہور نے کہا کہ انتظامیہ کو واضح ہدایات ہیں، کریک ڈاون کو اے سیز لیڈ کررہے ہیں ماحولیاتی تحفظ ایجنسی و پیرا فورس پر مشتمل ٹیمیں کاروائیاں جاری رکھیں، کریک ڈاون کو روزانہ کی بنیاد پر سخت اور مانیٹر کیا جائیگا۔