یونین کمیٹی 8 کی وائس چیئرمین کی نشست پر پیپلزپارٹی کے امیدوار خلیل احمد ہوت کی کامیابی،لیاری میں جشن کا سماں

میئر کراچی کے ترجمان کرم اللہ وقاصی نے یونین کمیٹی 8 کی وائس چیئرمین کی نشست پر خلیل ہوت کی کامیابی پر لیاری، یوسی 8 اور شاہ بیگ لین کے عوام اور پارٹی کارکنوں کا شکریہ ادا کرتے ہوئے کہا کہ یہ کامیابی انتخابی عمل میں عوام کی شرکت اور مقامی سطح پر سیاسی حمایت کی عکاسی کرتی ہے۔لیاری کے عوام نے ضمنی انتخاب میں اپنا فیصلہ سنا دیا، یونین کمیٹی 8 کی وائس چیئرمین کی نشست پر پاکستان پیپلزپارٹی کے امیدوار خلیل احمد ہوت کی کامیابی پر لیاری میں جشن کا سماں رہا۔ اس موقع پر پیپلزپارٹی کے کارکنوں اور جیالوں نے خوشی کا اظہار کیا اور ایک دوسرے کو مبارکباد پیش کی۔ترجمان میئر کراچی کرم اللہ وقاصی نے جشنِ کامیابی کے موقع پر خطاب کرتے ہوئے کہا کہ لیاری کے ضمنی انتخاب میں بعض مخالفین نے پاکستان پیپلزپارٹی کے خلاف غیر اخلاقی مہم چلائی اور ترقیاتی کاموں پر سوالات اٹھائے، لیکن لیاری کی ترقی اور عوامی خدمت کا ریکارڈ سب کے سامنے ہے۔ترجمان میئر کراچی کرم اللہ وقاصی نے کہا کہ پاکستان پیپلزپارٹی کے پاس لیاری میں دکھانے کے لیے بہت کچھ ہے۔ میڈیکل کالج، یونیورسٹی، اسپتال، بین الاقوامی معیار کے کھیلوں کے میدان، بنیادی شہری نظام اور نکاسی آب کے لیے پمپنگ اسٹیشنز سمیت متعدد ترقیاتی منصوبے پیپلزپارٹی کے دور میں قائم کیے گئے۔ انہوں نے کہا کہ عوام خود موازنہ کرسکتے ہیں کہ مختلف ادوار میں لیاری کے لیے کیا کام کیا گیا۔پارلیمانی لیڈر کرم اللہ وقاصی نے جماعت اسلامی کی سابقہ میئرشپ کا حوالہ دیتے ہوئے کہا کہ عبدالستار افغانی 2 مرتبہ اور نعمت اللہ خان ایک مرتبہ کراچی کے میئر رہے، تاہم ان ادوار میں لیاری کے لیے کیے گئے کاموں پر بھی بات ہونی چاہیے۔ ان کے بقول مخالفین کے پاس پیپلزپارٹی کی تنقید کے بجائے اپنا ترقیاتی ریکارڈ پیش کرنے کا موقع ہے۔انہوں نے کارکنوں سے مخاطب ہوتے ہوئے کہا کہ پیپلزپارٹی کے پاس بھٹو، بی بی اور بلاول بھٹو زرداری کے نظریے سے وابستہ جانثار کارکنوں کی بڑی قوت موجود ہے۔ اگر ہم منظم اور متحد رہیں تو سیاسی مقابلے میں اپنی اجتماعی قوت کا بھرپور اظہار کرسکتے ہیں۔ترجمان میئر کراچی کرم اللہ وقاصی نے کہا کہ بعض لوگ سوال کرتے ہیں کہ بھٹو آج بھی زندہ کیسے ہے، انہیں سمجھنا چاہیے کہ بھٹو اپنے نظریے میں زندہ ہے اور اس نظریے کا بنیادی مقصد عوام کی خدمت ہے۔ پاکستان پیپلزپارٹی کا سیاسی فلسفہ عوام کے ساتھ کھڑے ہونا اور ان کے مسائل کے حل کے لیے جدوجہد کرنا ہے۔ لیاری کے جن لوگوں کے دلوں میں شہید ذوالفقار علی بھٹو کی محبت زندہ ہے، وہ آج بھی پارٹی کے ساتھ کھڑے ہیں۔پارلیمانی لیڈر کرم اللہ وقاصی نے کہا کہ چیئرمین بلاول بھٹو زرداری کے وژن کے تحت جاری ترقیاتی منصوبے اہمیت رکھتے ہیں۔ کے تھری منصوبے اور لیاری کی ترقی کے مجوزہ پروگرام کی تکمیل سے علاقے میں بنیادی سہولتوں اور شہری زندگی پر مثبت اثرات مرتب ہونے کی توقع ہے۔انہوں نے شہید ذوالفقار علی بھٹو کے لیاری سے خصوصی تعلق کا ذکر کرتے ہوئے کہا کہ بھٹو شہید نے لیاری کو اپنا دل اور اپنی جان قرار دیا تھا، جبکہ شہید محترمہ بے نظیر بھٹو نے بھی ہمیشہ اس علاقے کو خصوصی اہمیت دی۔ آج چیئرمین بلاول بھٹو زرداری بھی لیاری کو اپنی ترجیحات میں شامل رکھتے ہیں۔ترجمان میئر کراچی کرم اللہ وقاصی نے مزید کہا کہ لیاری نے مشکل ترین حالات میں بھی پاکستان پیپلزپارٹی کا ساتھ نہیں چھوڑا، اس لیے پارٹی بھی اپنے وفادار اور جانثار کارکنوں کو کبھی تنہا نہیں چھوڑے گی۔ خلیل احمد ہوت لیاری کا حصہ ہیں اور ہمیشہ لیاری کے عوام کے ساتھ رہیں گے۔انہوں نے کارکنوں کو متحد رہنے کا پیغام دیتے ہوئے کہا کہ کامیابی پر لیاری، یوسی 8 اور شاہ بیگ لین کے عوام، پارٹی رہنماؤں، کارکنوں اور جیالوں کو مبارکباد پیش کرتے ہیں۔ آئیں، ہم سب اتحاد، تنظیم اور عوامی خدمت کے جذبے کے ساتھ آگے بڑھیں۔