*انعامی اسکیم کے آغاز سے قبل پنجاب ریونیو اتھارٹی کا ہوٹل اینڈ ریسٹورنٹ سیکٹر کی کڑی نگرانی کا فیصلہ*

چیئرمین پنجاب ریونیو اتھارٹی معظم اقبال سپرا کی زیر صدارت محکمانہ امور سے متعلق اجلاس منعقد ہوا، جس میں ہوٹل اینڈ ریسٹورنٹ سیکٹر میں ٹیکس قوانین پر عملدرآمد اور انعامی اسکیم کے اجراء سے قبل نگرانی کے اقدامات کا جائزہ لیا گیا۔ترجمان پنجاب ریونیو اتھارٹی کے مطابق انفورسمنٹ ونگ کو ہوٹلز اور ریسٹورنٹس میں الیکٹرانک انوائس مانیٹرنگ سسٹم کے نفاذ اور کاروباروں کی کڑی نگرانی کا ٹاسک سونپ دیا گیا ہے۔ انعامی اسکیم کے آغاز سے قبل ریسٹورنٹس میں صارفین کو باقاعدہ ڈیجیٹل رسیدوں کی فراہمی یقینی بنائی جائے گی۔ترجمان نے بتایا کہ پی او ایس مشینوں میں ردوبدل، جعلی رسیدیں جاری کرنے اور غیر قانونی طور پر ٹیکس وصولی میں ملوث کاروباروں کے خلاف سخت کارروائی عمل میں لائی جائے گی۔ صارفین سے ٹیکس وصول کرکے سرکاری خزانے میں جمع نہ کروانے والے کاروباروں کی بھی نشاندہی کی جائے گی۔کیش اور ڈیجیٹل ادائیگیوں کے ریکارڈ کی جانچ پڑتال کے ذریعے ٹیکس چوری اور بے ضابطگیوں کی روک تھام کی جائے گی۔ ترجمان نے واضح کیا کہ صارفین کو کھانے کے بل کے ساتھ جاری کی جانے والی جعلی یا غیر تصدیق شدہ رسید کسی صورت قابل قبول نہیں ہوگی۔ترجمان پنجاب ریونیو اتھارٹی نے عوام سے اپیل کی ہے کہ ڈیجیٹل ادائیگیوں سے انکار کرنے یا باقاعدہ رسید جاری نہ کرنے والے کاروباروں کے خلاف شکایات درج کروائیں تاکہ ٹیکس قوانین پر مؤثر عملدرآمد اور شفاف نظام کو یقینی بنایا جا سکے۔

جواب دیں

Back to top button