وزیر بلدیات کی زیرصدارت اجلاس، لوکل گورنمنٹ ایکٹ کے مسودے پر غور،ترمیمی بلدیاتی قوانین میں مقامی حکومتوں کو زیادہ بااختیار بنائیں گے، ذیشان رفیق

وزیر بلدیات ذیشان رفیق کی زیر صدارت سول سیکرٹریٹ میں ہونے والے اجلاس کے دوران پنجاب میں ترمیمی لوکل گورنمنٹ ایکٹ کے مسودے پر مزید غور کیا گیا۔ سیکرٹری لوکل گورنمنٹ شکیل احمد میاں اور سپیشل سیکرٹری آسیہ گل نے بھی شرکت کی۔ ایڈیشنل سیکرٹری لوکل گورنمنٹ ارشد بیگ نے مجوزہ بلدیاتی ایکٹ پر بریفنگ دی۔ اجلاس کے دوران میٹروپولیٹن کارپوریشن، ٹائون کارپوریشن اور میونسپل کمیٹی کے دائرہ کار پر غور کیا گیا۔ وزیر بلدیات ذیشان رفیق نے کہا کہ مجوزہ مسودہ قانون میں سات لاکھ سے زائد آبادی والے شہر کو بگ سٹی قرار دینے کی تجویز دی ہے۔ تحصیل کو نئے نظام میں ایک یونٹ کا درجہ دیا جائے گا۔ اس لئے پنجاب حکومت کو ہر تحصیل میں پہلی دفعہ تحصیل کونسل کا قیام تجویز کیا گیا ہے۔ ذیشان رفیق نے کہا کہ نئی مردم شماری کی روشنی میں حدبندی کے عمل کے بعد یونین کونسلز کی اصل تعداد کا تعین ہوگا۔ خواتین، اقلیتوں، کسانوں/ ورکرز اور نوجوانوں کی بھی ہر سطح پر نمائندگی ہوگی۔ وزیر بلدیات نے کہا کہ ترمیمی بلدیاتی قانون میں مقامی حکومتوں کو زیادہ بااختیار بنائیں گے تاکہ شہریوں کے مسائل مقامی سطح پر حل ہوسکیں۔ انہوں نے کہا کہ وزیراعلی مریم نواز شریف پنجاب میں مستحکم اور دیرپا بلدیاتی نظام چاہتی ہیں۔ ان کی ہدایات کے تحت نئے مسودہ قانون پر تفصیلی کام کیا جا رہا ہے۔ ذیشان رفیق نے کہا کہ عوام کی توقعات پوری کئے بغیر ترقی کے اہداف حاصل نہیں کئے جا سکتے۔ نئی مردم شماری کے بعد مقامی حکومتوں کے ڈھانچے میں تبدیلی ہونی چاہیئے لہذا آبادی میں اضافے کے ساتھ بلدیات اداروں کا دائرہ کار بڑھانا ضروری ہے۔ انہوں نے کہا کہ وزیراعلی مریم نواز شریف کی منظوری کے بعد مسودہ صوبائی کابینہ کے اجلاس کو بھجوایا جائے گا۔