پنجاب بھر میں امن و امان کے قیام اور بین المسالک ہم آہنگی کیلئے احسن اقدام،وزیراعلی پنجاب نے ضلعی امن کمیٹیوں کی ازسرنو تشکیل کی منظوری دے دی۔محکمہ داخلہ پنجاب نے تمام اضلاع کے ڈپٹی کمشنرز کو نئی امن کمیٹیوں کے نوٹیفیکیشن کیلئے مراسلہ جاری کردیا ہے۔پنجاب بھر میں ضلعی امن کمیٹیوں کی ازسرنو تشکیل کیلئے تمام مسالک سے نمائندگی لی جائے گی۔آخری بار ضلعی امن کمیٹیاں 2018 میں تشکیل دی گئی تھیں۔
ضلعی امن کمیٹیوں کے اکثر عہدیداران انتقال کر گئے یا انتہائی ضعیف اور غیر موثر ہو گئے ہیں۔
امن کمیٹیوں کی تشکیل کیلئے تمام ممبران کی متعلقہ ڈسٹرکٹ انٹیلیجنس کمیٹی سے کلیرنس لی جائے گی۔ازسرنو تشکیل سے ضلعی امن کمیٹیاں بین المذاھب و مسالک ہم آہنگی اور فرقہ واریت کے خاتمے کیلئے موثر کردار ادا کر سکیں گی۔
متعلقہ ڈپٹی کمشنر کی سربراہی میں تمام ضلعی امن کمیٹیوں میں ممبران اسمبلی، میئر، چیئرمین میونسپل کمیٹی، ڈی پی او، سپیشل برانچ، سی ٹی ڈی عہدیداران اور تمام مسلک کے نمائندگان شامل ہوتے ہیں ۔نئی امن کمیٹیوں کے نوٹیفیکیشن 2 ہفتے کے اندر جاری کرنے کے احکامات جاری کئے گئے ہیں۔
