پنجاب پلاننگ اینڈ ڈویلپمنٹ بورڈ نے مالی سال 2024-25 کے صوبائی ڈویلپمنٹ ورکنگ پارٹی کے دسویں اجلاس میں مختلف سیکٹر زکی 9 ترقیاتی سکیموں کے لیے مجموعی طور پر 50 ارب 76کروڑ 68لاکھ 48 ہزار روپے کے فنڈز کی منظوری دی۔ اجلاس کی صدارت چیئرمین پی اینڈ ڈی بیرسٹر نبیل احمد اعوان نے کی۔صوبائی ورکنگ پارٹی کے اجلاس میں ترقیاتی بورڈ کی جانب سے جن سکیموں کی منظوری دی گئی ان میں سیالکوٹ میں مرالہ بیرج کے کالونی پروٹیکشن بند کی توسیع ٹنل والا نالہ کی ری الائنمنٹ کیلئے 3 ارب 16کروڑ 22لاکھ 89 ہزار روپے، اپنی چھت اپنا گھر پروگرام کیلئے 9 ارب 88کروڑ 96لاکھ 81ہزار روپے، چیف منسٹر پنجاب سکولز میلز پروگرام کیلئے 6 ارب 1 کروڑ 12لاکھ 28ہزار روپے، وزیر اعلیٰ اقدامات برائے زرعی جنگلات کیلئے 1 ارب روپے، وزیر اعلیٰ اقدامات برائے پاکستان کے لئے پلانٹ (ترمیمی) کیلئے 8 ارب روپے، پنجاب میں کیکڑے کی فارمنگ کیلئے 8 ارب 53کروڑ 4لاکھ 90 ہزار روپے، وزیر اعلیٰ پروگرام برائے روشن گھرانہ کیلئے 9 ارب 50 کروڑ روپے، لاہور میں قائد اعظم انٹر چینج (لاہور رنگ روڈ) تا واہگہ بارڈر جی ٹی روڈ کی مرمت و بحالی کیلئے 3 ارب 28کروڑ 24لاکھ 50 ہزار روپے اورشیخوپورہ میں کچہری رسول نگر روڈ ریلوے کراسنگ کے مقام پر انڈر پاس کی تعمیر (ترمیمی) کیلئے 1 ارب 39کروڑ 7لاکھ 10 ہزار روپے شامل ہیں۔اجلاس میں صوبائی سیکرٹری پی اینڈ ڈی بورڈ ڈاکٹر آصف طفیل سمیت چیف اکانومسٹ ناصر اقبال ملک، متعلقہ سیکرٹریز، محکمہ
جات کے اعلی افسران اور پنجاب پلاننگ اینڈ ڈویلپمنٹ بورڈ کے ممبران نے شرکت کی۔
