کمشنر لاہور ڈویژن مریم خان کی زیر صدارت انسداد ڈینگی جائزہ کے لئے ڈویژنل اجلاس منعقد ہوا۔ اجلاس میں لاہور، ننکانہ، قصور اور شیخوپورہ میں ڈینگی سرویلنس اور ڈینگی یوزرز کا جائزہ لیا گیا۔ چاروں اضلاع کے ڈپٹی کمشنرز نے بریفنگ دی۔ انہوں نے بریفنگ دیتے ہوئے کہا کہ ہر ضلع میں انسداد ڈینگی سرویلنس سوفیصد جاری ہے، ڈینگی ٹیمیں فیلڈ میں موجود ہیں۔ لاہور میں امسال ابتک 18030 ڈینگی لاروا کو تلف کیا گیا مزید سرویلنس جاری ہے۔کمشنرلاہورڈویژن مریم خان نے کہا کہ لاہور ڈویژن میں ڈینگی وائرس سے کوئی ہلاکت رپورٹ نہیں ہوئی، لاہور میں 2026 میں ابتک ڈینگی کے 6 مثبت کیسز سامنے آئے اور 3036مشتبہ کیسز رپورٹ ہوئے۔ انہوں نے کہا کہ لاہور میں ڈینگی سرویلنس میں 18011 وارننگ نوٹس جاری جبکہ 19 مقدمات درج ہوئے ہیں۔ کمشنر لاہور نے مزید کہا کہ وزیراعلی پنجاب کا فوکس صحت عامہ ہے اس پر کوئی کمپرومائز نہیں۔اجلاس میں ڈی سی لاہور کیپٹن ر علی اعجاز، ڈی سی ننکانہ راو تسلیم اختر، ڈی سی شیخوپورہ شاہد عمران مارتھ، ڈی سی قصور آصف رضا، اے سی جی وجیہہ ثمرین، سی ای او ہیلتھ لاہور سمیت دیگر افسران نے شرکت کی۔
