وزیر اعلیٰ گلگت بلتستان حاجی گلبر خان نے کہا ہے کہ گلگت بلتستان میں کھیلوں کے فروغ کیلئے صوبائی حکومت ہر ممکن اقدامات کررہی ہے۔ گلگت کے شاہی پولو گراؤنڈ کو سٹیڈیم طرز پر تعمیر کیا جائے گا جس میں کھلاڑیوں اور شائقین کیلئے سہولیات فراہم کی جائیں گی۔ ان خیالات کااظہار وزیر اعلیٰ گلگت بلتستان حاجی گلبر خان نے جشن آزادی پولو ٹورنامنٹ میں شرکت کرنے والے ٹیموں میں چیکس تقسیم کرنے کے حوالے سے منعقدہ تقریب کے موقع پر گفتگو کرتے ہوئے کیا۔ وزیر اعلیٰ نے کہا کہ پولو گلگت بلتستان کا روایتی کھیل ہے جس کو فروغ دینے کیلئے اقدامات کئے جائیں گے۔ صوبے میں موجود تمام بینکوں کو ہدایت کی جائے گی کہ پولو سمیت دیگر کھیلوں کے فروغ میں اپنا کردار ادا کریں۔ آئندہ مالی سال میں کھیلوں کے فروغ کیلئے خصوصی بجٹ مختص کی جائے گی۔ اس موقع پر وزیر اعلیٰ نے جشن آزادی پولو ٹورنامنٹ کے ونر ٹیم کو دو لاکھ، رنر ٹیم کو ایک لاکھ، گلگت بلتستان پولو ایسوسی ایشن کو دو لاکھ، چترال اے ٹیم کو ایک لاکھ اور چترال سکاؤٹس ٹیم میں ایک لاکھ کے چیکس تقسیم کئے۔
