الیکشن کمیشن سیکریٹریٹ گلگت بلتستان نے بلدیاتی انتخابات 2026 کے لیے ووٹروں کی رجسٹریشن، ووٹ کی منتقلی اور انتخابی کوائف کی تصحیح کے عمل میں مزید سہولت فراہم کرنے کے لیے اس کی مدت میں توسیع کر دی ہے۔الیکشن کمیشن کی جانب سے جاری کردہ نوٹیفکیشن کے مطابق، الیکشن ایکٹ 2017، الیکشن رولز 2017، گلگت بلتستان لوکل گورنمنٹ ایکٹ 2014 اور گلگت بلتستان لوکل گورنمنٹ (کنڈکٹ آف الیکشن) رولز 2025 کے تحت معزز چیف الیکشن کمشنر گلگت بلتستان راجہ شہباز خان (تمغہ شجاعت) نے بلدیاتی انتخابات 2026 کے سلسلے میں ووٹر رجسٹریشن کے عمل کو 15 جولائی 2026 سے 25 جولائی 2026 تک توسیع دینے کی منظوری دے دی ہے۔شعبہ تعلقات عامہ کے مطابق اس دوران گلگت بلتستان کے اہل ووٹرز فارم نمبر 13 اور فارم نمبر 14 کے ذریعے نئی رجسٹریشن، ووٹ کی منتقلی اور اپنے انتخابی کوائف میں درستی کے لیے درخواستیں جمع کرا سکیں گے۔چیف الیکشن کمیشن گلگت بلتستان راجہ شہباز خان نے عوام سے اپیل کی ہے کہ وہ مقررہ مدت سے بھرپور استفادہ کرتے ہوئے اپنے ووٹ کے اندراج، منتقلی اور کوائف کی تصحیح کو یقینی بنائیں تاکہ بلدیاتی انتخابات 2026 کے لیے انتخابی فہرستوں کو مزید جامع، درست اور شفاف بنایا جا سکے۔
گلگت بلتستان، بلدیاتی انتخابات 2026 کے لئے ووٹر رجسٹریشن، منتقلی اور کوائف کی درستگی کا عمل 25 جولائی تک توسیع
