وزیر ہاؤسنگ اینڈ اربن ڈویلپمنٹ پنجاب بلال یاسین نے نہرو پارک اور کریم پارک کا دورہ کیا اور دونوں پارکس میں جاری ترقیاتی، بحالی اور تزئین و آرائش کے کاموں کا تفصیلی جائزہ لیا۔ ڈائریکٹر انجینئرنگ پی ایچ اے سماویہ اور دیگر متعلقہ افسران نے صوبائی وزیر کو پارکس میں جاری بحالی اقدامات، ترقیاتی کاموں اور انتظامات کے حوالے سے تفصیلی بریفنگ دی۔ اس موقع پر وزیر ہاؤسنگ بلال یاسین نے ہدایت کی کہ انجینئرنگ ونگ جاری ترقیاتی کاموں کی رفتار مزید تیز کرے، منصوبوں کی تکمیل میں کسی قسم کی تاخیر قابل قبول نہیں ہوگی۔ انہوں نے کہا کہ ترقیاتی منصوبوں میں تعمیراتی معیار اور پائیداری کو ہر صورت یقینی بنایا جائے۔ صوبائی وزیر نے بتایا کہ پارکس میں شہریوں کے لیے بہتر، محفوظ اور معیاری تفریحی سہولیات فراہم کی جائیں گی۔ نہرو پارک اور کریم پارک کی اپ گریڈیشن سے علاقے میں گرین ایریا اور تفریحی سہولیات میں نمایاں بہتری آئے گی اور علاقہ مکینوں کو صحت مند و مثبت سرگرمیوں کے لیے بہتر ماحول میسر آئے گا۔ بلال یاسین نے پی ایچ اے حکام کو ہدایت کی کہ تمام پارکس میں جاری تعمیراتی اور تزئین و آرائش کے کاموں کی مسلسل مانیٹرنگ یقینی بنائی جائے۔ انہوں نے کہا کہ وزیراعلیٰ پنجاب کی ہدایت پر شہر کے تمام پارکس کی بحالی کا آغاز کیا جاچکا ہے۔ وزیر ہاؤسنگ نے واضح کیا کہ پارکس کی بحالی کے ساتھ بنیادی شہری سہولیات کی بہتری بھی حکومت کی ترجیحات میں شامل ہے۔ کریم پارک میں زیر زمین واٹر ٹینک کی بدولت ملحقہ آبادیوں میں نکاسی آب کے مسائل پر قابو پانے میں مدد ملی ہے۔ان کا مزید کہنا تھا کہا کہ حکومت شہریوں کو بہتر ماحول، سرسبز مقامات اور معیاری تفریحی سہولیات کی فراہمی کے لیے عملی اقدامات جاری رکھے گی۔
*وزیر ہاؤسنگ بلال یاسین کا نہرو پارک اور کریم پارک میں جاری ترقیاتی کاموں کا جائزہ*
