ڈی سی لاہور سید موسیٰ رضا کی زیر صدارت لاہور ڈویلپمنٹ پلان کے تحت جاری ترقیاتی منصوبوں پر ایک اہم اجلاس منعقد ہوا۔ اجلاس میں چیف آفیسر میونسپل کارپوریشن لاہور شاہد عباس کاٹھیا، ایڈیشنل ڈپٹی کمشنر فنانس اینڈ پلاننگ مدثر نواز، تمام اسسٹنٹ کمشنرز، ڈپٹی مینجنگ ڈائریکٹر واسا اور دیگر اہم افسران شریک ہوئے۔ اجلاس میں شرکاء نے ڈی سی لاہور کو جاری ترقیاتی کاموں اور پیشرفت سے آگاہ کیا۔ ڈی سی لاہور نے کہا کہ تمام اسٹیک ہولڈرز کے ساتھ ملکر شفافیت کو یقینی بنایا جائے تاکہ منصوبے کی کامیابی ممکن ہو سکے۔
ڈی سی لاہور نے ہدایت دی کہ تعمیراتی کاموں کے معیار کو برقرار رکھا جائے اور ٹھیکیدار اعلیٰ اور معیاری میٹیریل کا استعمال یقینی بنائیں۔ انہوں نے کہا کہ منصوبے کے اہداف کے حصول میں کسی قسم کا کوئی سمجھوتہ نہیں کیا جائے گا۔ ڈی سی لاہور نے زور دیا کہ لاہور ڈویلپمنٹ پلان کے تحت ترقیاتی کاموں کی تکمیل دی گئی ڈیڈ لائن کے مطابق کی جائے۔ انہوں نے کہا کہ یہ ایک میگا پراجیکٹ ہے اور اس کی کامیابی کے لئے سب کو ملکر کام کرنا ہے۔ ڈی سی لاہور نے مزید کہا کہ لاہور ڈویلپمنٹ پلان سے شہر کی خوبصورتی میں مزید اضافہ ہو گا۔ اس منصوبے کے تحت لاہور کی گلیوں میں سیوریج اور دیگر کاموں کے بعد ٹف ٹائلز لگائی جائیں گی، جس سے شہر کا ماحول مزید خوبصورت اور منظم ہو گا۔ ڈی سی لاہور نے یہ بھی کہا کہ ضلعی انتظامیہ لاہور کے عوام کو بہترین سہولتیں فراہم کرنے کے لئے پرعزم ہے۔ انہوں نے زور دیا کہ تمام اسٹیک ہولڈرز کو ایک ساتھ ملکر کام کرنا چاہئے تاکہ لاہور ڈویلپمنٹ پلان کی کامیابی یقینی بنائی جا سکے۔
