کمشنر لاہور زید بن مقصود نے والٹن روڈ ترقیاتی سکیم کا دورہ کیا اور تعمیری پیشرفت کا تفصیلاً جائزہ لیا۔ اس موقع پر ڈی سی لاہور سید موسی رضا، اے سی ماڈل ٹاون و کینٹ، واسا اور ٹریفک پولیس افسران بھی ہمراہ موجود تھے۔
سی بی ڈی افسران نے زیر تعمیر والٹن روڈ پر پیشرفت بارے بریفنگ دیتے ہوئے کہا ہے کہ والٹن روڈ اپگریڈیشن منصوبہ کا 80فیصد کام مکمل ہو چکا ہے، مین روڈ مکمل تیار ہے، گرین بیلٹس پر کام شروع ہے، والٹن روڈ کی دونوں کیرج ویز پر اسفالٹ کا کام بھی مکمل ہے، روڈ ٹریفک کے لئے فعال ہے، والٹن روڈ پر 4.2 کلومیٹر کا ٹرنک سیوریج لائن مکمل، اولڈ نالہ کو نئے نالے میں منتقل کر دیا گیا ہے۔ والٹن روڈ پر میجر اسحاق شہید فلائی اوور ٹریفک کے لئے فعال ہے، فلائی اوور 510 میٹر طویل دو لائینز پر مشتمل ہے۔ کمشنرلاہور نے والٹن روڈ تعمیری پیشرفت پر عدم اطمینان کا اظہار کرتے ہوئے ورکنگ تیز کرنے کی ہدایت کی۔ کمشنر لاہور نے کہا ہے کہ وزیر اعلی پنجاب کی ہدایات کیمطابق والٹن روڈ پر باقی ماندہ کاموں کو بھی جلد مکمل کیا جائے، والٹن روڈ کی مکمل تعمیر سے شہریوں کو آمدورفت میں بہترین سہولت میسر ہو گی، والٹن روڈ پر رائیڈر سیور کے باعث نالہ بھرنے سے گلیوں کا پانی واپس محلوں میں نہیں جائیگا، والٹن روڈ فیروزپور روڈ تا ڈیفنس آمدورفت کیلئے اہم مین آرٹری ہے، منصوبہ کی جلد تکمیل ضروری ہے۔
