لاہور: پنجاب یونیورسٹی کے پہلے الومنی ملاقات کی تقریب میں سینئر سیاستدان، پنجاب یونیورسٹی کے الومنی اور سابق مشیر وزیراعظم پاکستان، محترم خواجہ احمد حسّان نے شرکت کی۔ اس موقع پر انہوں نے یونیورسٹی کے وی سی پروفیسر ڈاکٹر محمد علی کی اس انقلابی پہل کا خیرمقدم کیا جس کے ذریعے یونیورسٹی کے قدیم اور کامیاب الومنی کو ایک چھت کے نیچے اکٹھا کیا گیا، تاکہ مختلف منصوبوں اور تعاون کے لیے مشترکہ راستے تلاش کیے جا سکیں۔خواجہ احمد حسّان نے کہا کہ پنجاب یونیورسٹی کا الومنی نیٹ ورک پاکستان کے سب سے بڑے اور قدیم تعلیمی ادارے کی ترقی اور فروغ کے لیے انتہائی اہمیت کا حامل ہے۔ انہوں نے وی سی پروفیسر ڈاکٹر محمد علی کی خدمات کی تعریف کرتے ہوئے کہا کہ وہ پاکستان کی سب سے بڑی ریاستی یونیورسٹی کے لیے ایک قیمتی اثاثہ ہیں، اور ان کی قیادت میں ہمیں امید ہے کہ یونیورسٹی کو مالی بحران سے نکال کر ایک مستحکم مستقبل کی طرف گامزن کیا جائے گا۔پروفیسر ڈاکٹر محمد علی نے اس موقع پر اپنے خیالات کا اظہار کرتے ہوئے کہا کہ ان کا مقصد یونیورسٹی کی عزت و شہرت کو بلند کرنا اور تمام الومنی کے ساتھ مل کر تعلیمی اور تحقیقی میدان میں نئی بلندیوں کو چھونا ہے۔ انہوں نے اس بات کا عہد کیا کہ وہ یونیورسٹی کی مالی حالت میں بہتری لانے کے لیے مسلسل محنت کریں گے اور تمام وسائل کو بروئے کار لاتے ہوئے پنجاب یونیورسٹی کو ایک عظیم تعلیمی ادارہ بنائیں گے۔تقریب میں پنجاب یونیورسٹی کے مختلف شعبوں کے اساتذہ اور طلباء کے علاوہ سابقہ الومنی بھی موجود تھے، جنہوں نے اس ملاقات کو ایک منفرد موقع قرار دیا اور اس قسم کی مزید ملاقاتوں کے لیے اپنی دلچسپی کا اظہار کیا۔
اس موقع پر پروفیسر ڈاکٹر محمد علی نے یونیورسٹی کے الومنی کو ایک پلیٹ فارم فراہم کرنے کے عزم کا اعادہ کیا، تاکہ وہ اپنے تجربات اور مہارت کو یونیورسٹی کے ترقیاتی عمل میں شریک کر سکیں۔
اس موقع پر پروفیسر ڈاکٹر خالد محمود (پرو وی سی)، پروفیسر ڈاکٹر حامد سعید (ڈائریکٹر پی یو الومنی)، ڈاکٹر امجد عباس مغسی (صدر اکیڈمک اسٹاف ایسوسی ایشن)، پروفیسر ڈاکٹر حافظ ظفر (پرنسپل، ہیلی کالج آف کامرس) اور ڈاکٹر احمد منیب مہتہ (پرنسپل، ہیلی کالج آف بینکنگ اینڈ فنانس) بھی موجود تھے۔
