ڈپٹی کمشنر لاہور سید موسیٰ رضا کی قیادت میں ضلعی انتظامیہ نے وزیراعلیٰ پنجاب مریم نواز شریف کے زیرو پولیو ویژن کے تحت سات روزہ قومی پولیو مہم کامیابی سے جاری ہے۔ ڈپٹی کمشنر لاہور اور وزیر صحت خواجہ عمران نذیر کی مشترکہ صدارت میں منعقدہ اجلاس میں پولیو مہم کے نتائج کا جائزہ لیا گیا۔
اجلاس میں ڈی سی لاہور نے پولیو ٹیموں کے مائیکروپلان اور روٹ میپ کی تکمیل پر زور دیا اور ہدایت کی کہ کولڈ چین کی مناسب دیکھ بھال کو یقینی بنایا جائے۔ سید موسیٰ رضا نے واضح کیا کہ پانچ سال سے کم عمر کا کوئی بھی بچہ مہم سے محروم نہیں رہنا چاہیے اور اس مقصد کے لیے ضلعی انتظامیہ کی پوری ٹیم متحرک ہے۔ انہوں نے پولیو ٹیموں کو ہدایت کی کہ موبائل ایپ پر درست ڈیٹا کی بروقت فیڈنگ یقینی بنائی جائے اور گھروں اور بچوں کی انگلیوں پر نشان دہی کو بھی یقینی بنایا جائے۔ ڈپٹی کمشنر نے ویکسین کیریئر اور وائلز کی درست ترتیب پر خصوصی توجہ دینے کی بھی تاکید کی۔ وزیر صحت خواجہ عمران نذیر نے اسسٹنٹ کمشنرز کو فیلڈ میں نگرانی کو یقینی بنانے کی ہدایت کی اور کہا کہ متعلقہ محکمے مل کر پولیو مہم کو کامیاب بنائیں۔ ڈپٹی کمشنر لاہور اور وزیر صحت نے شہریوں سے پولیو ٹیموں کے ساتھ تعاون کی اپیل کی ہے۔ ضلعی انتظامیہ لاہور نے سات روزہ مہم میں 2.2 ملین بچوں کو پولیو کے قطرے پلانے کا ہدف مقرر کیا ہے۔ ڈپٹی کمشنر لاہور سید موسیٰ رضا نے کہا کہ مہمانوں اور مسافر بچوں کو بھی مہم میں شامل کیا جائے تاکہ کوئی بھی بچہ پولیو کے قطروں سے محروم نہ رہے۔ ضلعی انتظامیہ کی یہ جامع حکمت عملی پاکستان کو پولیو سے پاک کرنے میں اہم کردار ادا کرے گی، جس سے نہ صرف لاہور بلکہ پورے ملک کے بچوں کا مستقبل محفوظ ہوگا۔
