شاہ حسین ریجنل نیٹ ورک کی رکن تنظیموں نے پنجاب میں منتخب مقامی حکومتوں کے مسلسل عدم قیام پر شدید تشویش کا اظہار کرتے ہوئے سوال اٹھایا کہ پنجاب حکومت دیگر صوبوں کی طرح اختیارات نچلی سطح پر منتقل کرنے پر گریزاں کیوں ہے؟، تفصیل کے مطابق پنجاب میں مقامی حکومتوں کے فوری انتخابات کے لئے ریجنل کنونیئر ڈاکٹر راشد محمود وڑائچ کی قیادت میں مطالباتی ریلی کا اہتمام کیا گیا، اس موقع پر شرکائے ریلی کا کہنا تھا کہ پاکستان کے دیگر تینوں صوبوں میں مقامی حکومتیں کب سے نہ صرف قائم ہو چکی ہیں بلکہ منتخب نمائندوں کی قیادت میں مکمل طور پر فعال بھی ہیں جبکہ بدقسمتی سے پنجاب میں مقامی حکومتی ادارے منتخب قیادت کی بجائے سرکاری مشینری کے ذریعے چلائے جا رہے ہیں۔ ملک میں منتخب مقامی حکومتوں کا قیام آئین پاکستان کے آرٹیکل 7، 32 اور 140A کے ذریعے آئینی ضرورت ہے جب کہ صوبہ پنجاب کی عوام کو گزشتہ کئی سالوں سے اپنے اس آئینی حق سے محروم رکھا جا رہا ہے۔ شرکاء کی طرف سے مزید کہا گیا کہ پنجاب میں موثر گورنینس کے لئے بھی منتخب مقامی حکومتیں ناگزیر ہیں۔ ممبران ریجنل کونسل شاہ حسین نے ریلی میں مطالبہ کیا کہ پنجاب میں فوری طور پر مقامی حکومتوں کے انتخابات کرائے جائیں۔
