وزیر بلدیات ذیشان رفیق کی زیرصدارت پنجاب بھر کے میونسپل چیف آفیسرز کے ویڈیو لنک اجلاس میں ستھرا پنجاب پروگرام کے تحت آؤٹ سورس ماڈل میں پیشرفت کا جائزہ لیا گیا۔ سول سیکرٹریٹ میں ہونے والے اجلاس میں سیکرٹری لوکل گورنمنٹ شکیل احمد میاں، سپیشل سیکرٹری آسیہ گل اور ایڈیشنل سیکرٹری ماریہ طارق نے بھی شرکت کی۔ اجلاس کے دوران وزیر بلدیات نے چیف آفیسرز کو دستیاب انسانی وسائل اور مشینری کی تفصیل بھجوانے کی ہدایت کی۔ انہوں نے کہا کہ وزیراعلی مریم نواز شریف پنجاب بھر میں صفائی کا یکساں نظام متعارف کرانا چاہتی ہیں۔ پہلے مرحلے میں پائلٹ پراجیکٹ شروع کریں گے۔ جس کے لئے ہر ویسٹ مینجمنٹ کمپنی کم از کم ایک تحصیل میں پائلٹ پراجیکٹ شروع کرے گی۔ انہوں نے خبردار کیا کہ صفائی کے معاملے میں کوئی سستی برداشت نہیں کی جائے گی۔ وزیر بلدیات نے کہا کہ پہلی بار پنجاب میں صفائی کا موثر اور دیرپا ماڈل لانا چاہتے ہیں۔ انہوں نے کہا کہ دیہات کو نظرانداز کر کے صفائی کے اہداف حاصل نہیں کئے جا سکتے۔اس موقع پر سیکرٹری لوکل گورنمنٹ شکیل احمد میاں نے ہدایت کی کہ سی اوز دی گئی ہدایات پر عملدرآمد یقینی بنائیں۔ ہر ڈپٹی کمشنر کو بھی ستھرا پنجاب پروگرام کے لئے ضروری سہولیات فراہم کرنے کا کہیں گے۔ اجلاس میں عیدالاضحٰی کے لئے صفائی کے انتظامات کا بھی تفصیلی جائزہ لیا گیا۔
ستھرا پنجاب پروگرام: آؤٹ سورس ماڈل میں پیشرفت کا جائزہ،صفائی کے معاملے سستی برداشت نہیں کی جائے گی، وزیر بلدیات ذیشان رفیق
