پاکستان کے خلاف بھارت کی جارحیت، وزیراعلٰی خیبر پختونخوا علی امین گنڈاپور کی زیر صدارت صوبائی کابینہ کا ہنگامی اجلاس منعقد ہوا ۔ سپیکر صوبائی اسمبلی، صوبائی اسمبلی میں اپوزیشن لیڈر، کابینہ اراکین، چیف سیکرٹری، آئی جی پی، ایڈیشنل چیف سیکرٹری اور انتظامی سیکرٹریز نے شرکت کی۔ 
بھارتی جارحیت کے نتیجے میں شہید ہونے والوں کے درجات کی بلندی اور ملکی سلامتی کے لئے دعا۔ کابینہ کا بھارتی جارحیت پر سخت رد عمل کا اظہار اور جارحانہ اقدام کی شدید الفاظ میں مذمت کی گئی۔ ملکی دفاع کے لئے ہر قسم کی قربانی دینے کے عزم کا اظہار کیا گیا ۔ بھارتی جارحیت کا منہ توڑ جواب دینے کے لئے سکیورٹی فورسز کو ہر قسم کے تعاون کی یقین دہانی بھی کرائی گئی ۔ کابینہ کو پاک بھارت کشیدگی کی صورتحال پر بریفنگ دی گئی۔خیبر پختونخوا کابینہ کے مطابق بھارت کی طرف سے جارحیت قابل مذمت اور افسوسناک ہے، بھارت کی طرف سے رات کی تاریکی میں شہری آبادی کو نشانہ بنانا انتہائی شرمناک اور بزدلانہ اقدام ہے، بھارت کا یہ اقدام بین الاقوامی قوانین کی سنگین خلاف ورزی ہے۔ہم یہاں سے بھارت کو پیغام دینا چاہتے ہیں کہ ہم ملک کی دفاع کے لئے ہر وقت تیار ہیں، ہمارا ایمان ہے کہ غزوہ ہند ہوگا اور اس میں فتح مسلمانوں کی ہوگی، ہماری خوش قسمتی ہوگی اگر ہم غزوہ ہند کا حصہ بنیں، بحیثیت مسلمان ہمارے لئے سب سے بڑا رتبہ شہادت ہے اور ہم شہادت کے لئے ہر وقت تیار ہیں۔ علی امین گنڈاپور نے مزید کہا کہ
ہم کشمیر اور پنجاب کے عوام کے ساتھ کھڑے ہیں اور انہیں ہر ممکن تعاون کا یقین دلاتے ہیں، ملکی دفاع کے لئے ہم سب متحد ہیں، 25 کروڑ عوام ملک کی فوج ہے، مودی کی جارحانہ پالیسی اس کے اپنے ہی لوگوں اور ملک کو خطرے میں ڈال رہا ہے۔پاکستان اپنے تحفظ کے لئے بھر پور جواب دینے کا حق رکھتا ہے، ہمارے سکیورٹی فورسز بھارتی جارحیت کا بھر پور جواب دے رہے ہیں، بھارتی جارحیت کا بھر پور اور بروقت جواب دینے پر سکیورٹی فورسز کو خراج تحسین پیش کرتے ہیں، خیبر پختونخوا کی عوام اور حکومت سکیورٹی فورسز کے ساتھ بھر پور یکجہتی کا اظہار کرتے ہیں۔بھارتی فاشسٹ حکومت کا جارحانہ رویہ خطے کے امن کے لئے مستقل خطرہ ہے، بھارت ہماری امن کی خواہش کو کمزوری نہ سمجھے، ہم اینٹ کا جواب پتھر سے دیں گے، عالمی برادری بھارت کے اس جارحانہ رویے کا سخت نوٹس لے۔خیبر پختونخوا کے عوام ملک کی دفاع کے لئے کسی بھی قربانی سے دریغ نہیں کریں گے، وطن کی مٹی کے دفاع کے لئے ہماری جانیں حاضر ہیں۔صوبے کے عوام بھارتی جارحیت کا نشانہ بننے والے شہریوں کے ساتھ ہمدردی کا اظہار کرتے ہیں، خیبر پختونخوا کے عوام ان متاثرین کی امداد کے لئے ہر ممکن تعاون کی فراہمی کے لئے تیار ہیں۔اس اہم قومی معاملے پر مشاورت میں ہمارے لیڈر عمران خان کو شامل کیا جائے، ہمارے لئے سب سے پہلے پاکستان ہے۔
